Ich Eberhart von Wallsee hauptmann ob der Enns vergich offenbar mit dem gegenburtign brieff vnd tun kunt allen den die in sechent oder horent lesenn vmb die klag vnd krieg, die des gotshaus lewt ze Krembsmunster gen dem abpt vnd gen sein amptleuttn daselbs gehabt habent, das ich dewselben chlag vnd ansprach zwischen dem abbt vnd seiner lewt der eribler verrtcht vnd veraynt han nach erber weysen lewt rat also des sew paydenthalbn genuegt hat, vnd da es furbaz ewigkleichn bey beleiben schol als hernach geschribn stet. Der erstn so sprechen wir vmb die wandel der eribler, ist es vmb ain todslag, der in mit der hant tuet der soll den totslag pessern dem amptman mit zwain vnd sibentzig phenning am dritten tag vnd sullen weib vnd kind geruet sein. Es soll aber der den todslag tuet des abpts huld gewinnen vmb ein swert tzuchen. Den die sein helfer sint gewesen vnd doch den todslag nicht gethan habent, da ist das wandl sechzigk phening. Darnach so sprechn wir, wenn ein eribler ein wandel verwu^ericht der darumb gesezzen ist vnd phantmezzig ist, der scholl darumb nicht gesto^ecket werden. Ist er aber nicht gesessen, so mag sein apt oder sein ambtman wol nach im greiffen. Wir sprechen auch vmb die stiftung der eribler auf die ho^efe, das ist nicht recht die doch ir guet wol verdienn mugn. Es ist auch gesprochn, wo ein eribler auf ains andern guet vichte, do ist er dem abpt noch sein zichter nicht pueswertig vmb. Ist das ein man verspilt, da ist er nicht pueswertig vmb. Es ist auch gerett, welicher eribler sein guet verkauft, das will der abt halbs haben, das ist nicht recht vnd scholl ab sein. Stirbt ein man vnd leit seinem nagstn erib ein erib, da sol die anlait gnedig sein. Es scholl auch ain wochnwandell aim mann nicht mer sein wenn zwelif phenig. In dem vogttayding soll ein wandel nicht mer sein wann sechzig phenig. Welicher eribler ains amptman bedarf, der scholl im darumb nicht geben den das er gern tuen will. Es sullen auch die Stewr gebn als sitlich und gewondlich ist in dem lant nach genaden. Das in das hinfur paidenthalben dem abpt ze Krembsmunster vnd sein leuttn die zu dem selben gotshaws gehorent, stet vnd vnverchert beleib, daruber gib ich vorgenanter Eberhart von Wallsee haubtman ob der Enns zu eim warn steten vrkund diesen offen brieff besigelten mit meinem anhangunden jnsigel, der geben ist ze Wels, da man zalt von Cristi gepurd drewzehen hundert iar dar nach in dem sechs vnd funfzigistm iar des sambtztags vor sand Steffanns tag in dem snit.

Source Fulltext: OÖUB 7 (Wien 1876) S. 469f, Nr. 462