Ich Fridreich der Ro^et vergich offenleich an dem brief und tu^en chunt allen den die in sehent ho^ernt oder lesent, daz ich den zehent auf meinem ansidel mein herr^en von Chremsmu^enster mit meinem und aller meiner erben gu^etleichen willen und wort geben han also beschaidenleich nach meinem to^ed, daz in mein hausvrou^e dennoch haben schol zu irn tagen und schol si iaerleich davon geben meinen vorgenanten herren in ir oblay zehen metzen chorns und zehen metzen habern gestrichner mazze ze einem selgraet mir und mein vorvodern und allen meinen nachchomen. Wenn aber mein hausvrou^e nicht mer ist, so ist der vorgenant zehent ganz und gar meinn herren ledich in ir oblay als oben geschriben stet. Und schullen auch mein obgenant herren unsern jartag begen alle jar jaerchleich mit vigili und mit selmesse des naechsten phinztages nach sunnwenten acht tag vor oder in acht tagen hinnach, und an welhem tage si den jartag begen wellent daz schullen seu den erben chunt tu^en die auf dem ansidel gesezzen sint. Wu^erd aber daz von in versaumt waz dann des selben jares von dem zehent geviel, daz schullen di nachsten erben mit meiner herren gewizzen durch Got geben und tailen alle jar jerleich swenn si daz versaumten. Und zu einer ewigen stetichait der sach gib ich in den offen gegenwu^ertigen brief versigelten mit meinem anhangundem insigel, und zu einer pezzern bezeugnu^esse der sach versigelten mit meins pruder Niclas des Roten anhangundem insigel im an schaden. Der brief ist geben nach Christi gepurd uber dreuzehen hundert jar und dar nach in dem sechs und fu^enfzigistem jar des suntages vor sand Mathias tag.

Source Fulltext: OÖUB 7 (Wien 1876) S. 437, Nr. 430