Ich Ortolf der O^erhol purger ze Wels und ich Kathrei sein hausvrou^e und all unser erben wir veriehen offenwar an disem brief und tu^en chunt allen den, di in sehent ho^ernt oder lesent, daz wir von dem erbern herrn herrn Ernsten zden zeiten abt ze Chremsmu^enster und von demselben gotshaus erwarben haben ein gu^et, daz genant ist Hachweydech und gelegen ist in der pharr ze Sippachzell, und schullen da von wir und unser erben oder wer daz gut nach uns inne bat dem selben gotshaus alleierleich dienen unverzogenleich an sand Niclas tag sechzk phenning alter wienner mu^enz und ein vogt huen und nicht mer. Wer aver daz getan, daz dem vorgenanten gotshaus der dienst verzogen wu^erd an dem selben tag oder hinnach in acht tagen, so schol daz selb gotshaus auf dem egenanten gu^et mit unserm gu^etleichem willen umb den obgenanten dienst um sechzk phenning ze wandet an allen chrieg. Und daz diseu red also stet und unverchert beleib, dar uber gib ich in vorgenanter Ortolf der O^erhol disen gegenwu^ertigen offen brief versigelten mit meines swehers Hainreiches des Orholn anhangundem insigel im an schaden, wann ich selber aygens insygels nicht enhan. Der brief ist gegeben nach Christi gepurd dreuzehen hundert iar und dar nach in dem dreu und fu^enfzigisten iar des nachsten vreytages vor sand Kathreyn tag.

Source Fulltext: OÖUB 7 (Wien 1876) S. 333f., Nr. 326