Ich Hainreich der Vonstorfer und Gedraut mein hausfrau und unser baider erben vergehen offenleich an disem brief und tu^en chunt allen den, die in sehent, lesent oder horent lesen, das wir mit guetleichem willen und auch wol bedaht und mit unser baider freunten willen und rat gesatzt haben das guet, das genant ist auf der Stichel, und leit in Gaerstner pharr und ist lehen von dem pischolf ze Babenberch, fur zwainzich phunt phennig wienner munz dem erwirdigen prelat abt Ernsten ze Chremsmunster, der uns auch der vorgenanten phenning reht und redleich verricht und gewert hat. Wir sein auch des vor genanten guetes sein gewer nach landes reht und was in chrieges oder ansprach an gieng umb den egenanten satz, den schull wir aus richten an all seinen schaden und schol er das haben auf unsern treun und auf all unser hab, di wir haben in des herzogen landen ze Osterreich. Wir gehelen und vergehen auch des satz und aller vor geschriben taiding und gelub dem egenanten abt Ernsten oder wer uns oder ander i^em mit disem brief mont oder den inn hat. Das diseu red staet und unzebrochen beleib, gib ich disen brief ze eim offem u^erchund besigeltem mit meim anhangundem insigel, und sind des alles zeug Ernst der Ottstorfer, Meindel Teyerwanger, Perichtold Ottstorfer, Nycla Ottstorfer, Peter und Dietel im Usleich und ander erber leut. Der brief ist geben, do man zalt von Christes gepuerd tausent jar dreu hundert jar dar nach in dem ains und funfzigisten jar an sand Gregorij tag.

Source Fulltext: OÖUB 7 (Wien 1876) S. 237f., Nr. 232