Ich Hainrich Wernharezz dez Try^enau^eschleins sun und mein swester Margret und all unser bayder erben vergehen offenleich mit dem brief und tu^en chunt allen den, di in ansehent lesent oder ho^ernt, daz wir cho^emen sein zu unserm gna^edigen herrn Ernst zu den zeiten appt ze Chremsmu^enster und hat uns und unsern erben gelihen ze rechtem erybrecht zwai gu^et, di da haizzent ze Lerochstetten und glegen in Weyschiricher pfarr mit allen den rechten und nu^etzen, di dar zu^e geho^ernt besu^echt und unbesu^echt also mit aus genumer red, daz wir und unser erben oder wer deu gu^et nach uns besitzt, da von dienen schullen alle jar jaerchleich von den ob genanten zwain guten sechtzig pfenning und zwai vogt hůnrr an sand Niclas tag und steuer nach gnaden dem ob genanten gotzhaus ze Chremsmu^enster. Wa^er aber daz wir den vorgenanten dinst an dem ob genanten tag nicht enga^eben, so schol uns dez gotzzhaus amptman pfenten auf den ob genanten gu^eten vmb dienst und umb wandel alls ander dez gotzhaus aygen ze Chremsmu^enster recht hat an alles geva^er mit uns und unser erben gůtleichem willen und wort. Waer aber daz man steuer dar auf layt nach gnaden, vnd daz wir darwyder wollen sein, so schullen si uns aber darumb pfenten alls dez gotzzhaus aygen recht ist. Vnd daz daz also staet und unzebrochen beleib, dar u^eber geben wir dem vor genanten gotzhaus ze Chremsmu^enster den brief versigelten mit dez erbern mann Hainrich dez Schikchen ze den zeiten richter ze Wels anhangunden und rnit Hainrich dez Allten Try^enau^eschleins anhangunden insigel, wan wir aygner insigel nicht haben, und di ir insygel dar an gelegt habent der sache zu einer zeugnůz. Der brief ist geben, do von Christes gepu^erd ergangen warn dreuzehen hundert iar dar nach in dem ain und fu^enfzigisten iar an unser Vra^own tag zu der dienstzeit.

Source Fulltext: OÖUB 7 (Wien 1876) S. 263f., Nr. 258