Ich Stephan der Egenperiger, weilent hern Otakchers Sun von Egenberg, dem Got genad, vergich offenbar mit disem gegenbu^ertigen brief und tun chunt allen den, di in horent, sechent oder lesent, Daz ich mit wol bedachtem mut, mit rat und gunst meiner pesten vreunt hern Wilhalms von Winsperch Chorherr ze Pazzaw, hern Chorlein dez Rechs und Hainreichs dez Wurmtalers und ander meiner vreunt, di zu der weil mein und meiner hab phleger gewesen sint und den mein leib und mein gut auf ir trew enphlochen ist, mit der selben vorgenanten vreunt wille und wort han ich ze chauffen gegeben redleich und recht Danchwarten den Tanpechen, purger ze Wels und seinen zwain To^echtern Katrein und Elspeten und irn erben den Zechent datz den Sibenmaiern auf vier guten und auf der Mu^el, di dar zu geho^ert, und datz Aiterpach auf drin Ho^efen und auf der mu^el di da pei leit, der mein erib gewesen ist von dem Gotzhaus ze Chremsmu^enster und mit allen den rechten und nutzen alz ich in und mein vorvodern gehabt haben, umb ein gut, dez si mich gantz und gar verrieht und gewert habent und auch also mit beschaidner red, daz si dem vorgenanten Gotzhaus ze Chremsmu^enster allev Jar ierleich von dem Zechent dienen schullen an unser vrawn tag zu der Dienstzeit ain pfunt newer wienner pfenning und nicht mer, ich pin auch dez vorgenanten Zechentz und dez chauffs dar auff ir gewer fu^er alle ansprach, wo in dez not geschiecht ze hof ze taiding und also lantzrecht ist ob der Ens. Daz in di red staet und unverchert beleib, dar ůber gib ich Stephan Egenberger in ze urchunt disen brief mit meiner vorgenanten o^echaim anhangunden Jnsigel hern Wilhalms dez Winsperger und hern Chorleins dez rechts und Hainreich dez wurmtaler, wan ich selber zu den Zeiten nicht aigens insigels het, da von verpint ich mich mit meinen trewn under di vorgenanten Insigel alle di gelu^eb stet ze haben, die vorgesehriben stent. Daz ist geschehen nach christes gepurd ůber dreuzechen hundert Jar, darnach in dem Viertzkistem Jar an sant Nyclos tag.

Source Fulltext: OÖUB 6 (Wien 1872) S. 360f., Nr. 356