Ich Reinprecht, Friedereich Prueder von Walse zden Zeiten Hauptleut ze Ens Vergehen offenbar mit disem Prief, daz wir mit dem Gaistlichem Herren Apt Friedereichen ze Chremsmu^enster und mit seiner Pruederschaft da selben uberain chomen sein umb den Vischvanch, der geschiecht an der Stat, da der Se vleuzzet in di Alm und haizzet heribstzeit di Lauchwat mit solcher beschaidenhait, daz unser Vischer in der Alm uberall den gantzen Heribst des ain iars chainer lai Vischen nicht treiben schullen, pei nacht noch pei tag haimleich noch offenleich mit nichten, daz di visch an ir^een gang geirren mug, daz selben Vischen schullen ouch des Apts-Vischer in der Lauchwat als gaentzleich lazzen als di unser in der Alm, als er uns mit seinen trewn verhaizzen hat ouch zu dem Heribst des selben iares wand is nach unser pet in rechter mainung geschehen ist durch nicht anders daz pedenthalben di wazzer an den vischen dester reicher beleiben, wir verhaizzen ouch dem Apt und der Sammung mit unsern trewn, daz in von diser wandlung von vns noch von unsern Erben an derselben vischwaid ewichleich chain schad icht widervar noch is ze chain recht fu^erbas nicht enhaben schullen. Daz in di vorgeschriben wandlung stat und unverchert beleib, geb wir in disen prief versygelt mit unser Paider anhangunden Insygeln. Der prief ist gegeben, do sint Christes gepu^eert ergangen warn Dreuzehen hundert Jar darnach in dem Viertzkisten Jar an unser Vrow^en tag zder Schidung.

Source Fulltext: OÖUB 6 (Wien 1872) Nr. 341, S. 346