Evgenius Episcopus Seruus Seruorum Dei dilectis filiis Johanni Praeposito beati Lamperti Subenen Ecclesiae eiusque fratribus tam praesentibus quam futuris regularem vitam professis in perpetuum. Quotiens illud a nobis petitur, quod religioni et honestati conuenire cognoscitur, animo nos decet libenti concedere et petentium desideriis congruum impertiri suffragium. Huius rei gratia, dilecti in Domino filij, vestris justis postulationibus clementer annuimus et praefatam Ecclesiam, in qua diuino mancipati estis obsequio, sub beati Petri et nostra protectione suscipimus et presentis scripti patrocinio eonmunimus Statuentes, vt quascunque possessiones, quaecunque bona inpraesentiarum juste et canonice possidetis aut in futurum concessione pontificum, liberalitate Regum, largitione principum, oblatione fidelium seu aliis justis modis praestante Domino poteritis adipisci, firma vobis vestrisque successoribus et illibata permaneant, in quibus haec propriis duximus exprimenda vocabulis: Ecclesiam sanctae Margarethae virginis ad Henngst cum curte stabularia et omnibus pertinentiis suis, Ecclesiam Mallentin cum omnibus pertinentiis suis, quem admodum a yenerabili fratre nostro Conrado Saltzburgensi Archiepiscopo vobis rationabiliter sunt et scripto firmatae. Datum istius Bullae sub verborum tenore est tale: Datum Laterani per manum Roberti sanctae Romanae Ecclesiae presbyteri Cardinalis et Cancellarij pridie Non. Januarij Indictione nona, Incarnationis Dominicae Anno Millesimo (centesimo) quadragesimo sexto, pontificatus vero domini Eugenij tertij Papae anno primo.

Source Fulltext: OÖUB 2 (Wien 1856) S. 218-219