Wîr perîchtoldt von gotes gnaden graf ze Graîspach vnd ze marstetîn von nyffen genant vnd wîr graffîn Elspett seîn Eelîche hawsfraw verîechenn mît dem brîef allen den, dj. în ansechnt oder hornt lessen, das vns vnnser lîeber prueder Graf haînreîch von Schawnberg vnd vnser lîebe swester Graffîn Anna seîn wîrttînne vnd jr Erben sun vnd tochtter jren taîl der vesste ze Hohentruhendîng mît alle dew, vnd darzw gehortt, Es sey lewtte oder gutt, Edel oder vnedel, an holtz, an velde, an wasser etc. besucht vnd vnbesucht, als îs mît rechten taîl angeuallen ist, vmb XIIJ hundertt phunt haller versetztt haben mit solcher beschaidenhaitt, das sy von dem weissen Sunntag, der schirist ku^embt vnd dan.drew gantze Jar nicht wider erlossen sullen; vnd wenn nu dj drew jar Ennde genomen haben, so habnt sy gewallt zu lossen vmb dj Egenanten XIIJ hundert phunt haller, swenn Sy wellentt vnd doch also, das sy vns sullen lassen wissen, Swenn sy lossen wellen vor sechs wochen an dj Statt, da wir dan mit hofe sitzen; vnd dj vorgenannt XIIJ hundertt phuntt haller sullen sy vnns danne antwurtten vnd geben in den selben Sechs wochen in der viertt stett aine, gein Nürnberg, Munchen, Werde oder gein Inglstatt, welich wir wollen, da wir sy mit vnserm brief oder gewissen potten zu senden, an aller vnser schaden, wenn sy gelosset habent, als vor begriffen ist, so sullen wir oder vnser paider Erben vnsern vorgenanten Brueder vnd Swester Vnd iren Erben den vorgenantten jrn halben taill der Veste Hohentruhending, der lewtte vnd gute, dj darzw gehorennt, als vor begriffen ist, wider in antwurtten ledigclich vnd in aller der weisz, als sy vns dj ingesetzt heten, an widerred vnd an alle geua^erd. Ist auch, das sy in den selben Sechs wochen, vnd Sy vnns kundt habent getann, nicht lossent, so sein wir in furaws desselben Jares kainer losung gepunden, ob wir wellen. Wen auch dasselbe Jar ennde genomen hatt, so habennt sy denne alle Jar Jarlich vollen gewallt ze lossen in allen den rechten vnd pu^enden, also vor an disem brief geschechn ist. wurde auch vns zemvte, das wir vnsern halben tail an der vesste Hohentruhendingen, der vns mit taile geuallen ist, versetzen oder verkauften wolten, den sullen wir sy an pietten vnd sullen in den zu kawffen geben Nach zwaier Erbern Manne Ratt, der wir ainen vnd sy ainen dargeben sullen; vnd mu^egen vns dj zwen nicht gesawmen (sic), so schulten dj zwen nach jeren aideii vnd trewn einen Erbern dritten man zw in Nemen, der in paiden angeuer ein gemainer man sey, vnd was dj drey vmb den kawf vberein koment, des sullen wir pede gehorsam sein, das loben wir mit vnsern trewn. Auch das sy nicht kawffen mochten oder wolten, darnnach wir sy anpietten, in einem viertail eines Jars, so haben wir gewallt, das wir das gen andern lew^etten wol verkawffen mûgn vnd das sy vnns daran nicht enirren sullen. Auch globen wir an aydes weise mit vnsern trewn fur vns vnd fur all vnser Erben, das wir in di lossung, als vor geschriben ist, in kainer weisse an alles geua^er nicht verziechenn Noch versten sullen, wan ob sy lossen, als vor angeschribn ist, so sullen wir in jren halben tail der veste, der lewtte vnd gutter, als vor geschriben ist, wider in antwurtten freilich vnd ledigclich an widerred vnd an alle geua^er in aller der weisse, als sy vnns ingeantwurtt habennt vnd als vor an disem brief geschriben ist. Tatten wir aber des nichtt vnd wollten in das mit geuer verziechen, darüber haben wir gewunnenn vnsers gnadigen herren brief kaiser ludwigs von Rom, der vnns darumb von jren wegen benotten vnd bedringen soll, das in das alles wider var, das an disem brieffe geschriben stett: vnd darzw haben wir vnser lieb frewnd vnd lewtte Graf hawgen von pragentz, Graf hainreich von Werdenberck, Graf wilhalbmen von Montfurtt, graf ludwig von Otting, Herrn gotfriden von Hochenloch, Herrn Gebhartt von pranekk vnd herrn perchtolt den Truchsatzen gepetten vnd habent das gelobt an geua^er mit jrn trewen; Ob wir in dj losung verstu^enden, das sy danne gen vns mit leib vnd mit gute geholffen sullen sein als ver, das wir des beno^ett vnd bedwngen werden, das wir zw lossen geben, als vor an dism brief geschriben stett. Vnd komen sy des zw kainen schaden, ob wir in dj losung verstunden, das sullen sy habenn auf vns vnd auf vnsern Erben vnd auf aller der habe, die wir yndertt Habenn, versucht vnd vnuersuchtt, wie das genant ist vnd wo das gelegen ist. Auch das wir dj obgenante Vest Hochentruhendingen in der zeitt, vnd sy vns statt, verloren, des got nicht engebe, so sullen wir der vorgenanten XIIJ Hundertt phuntt Haller geraten vnd auf geligen vntzt als lang, das wir dj veste wider in vnser gewallt bringen, so sein wir jn dan willig der losung vnd gepunden in allen den puntten vnd rechten, als vor geschribenn stett vnd vnzeprochen behalten. Darvber zw Urkund geben wir disen brief mit vnsern vnd mit der Erbirdigen herrn vorgenannt Insigl versiglt; vnd wer, das der selben Herrn Insigl aines oder mer gepraste, das es an den brief nichtt kome, da sullen sy dennoch gaˆntzlich an alle, dew vorgeschriben ist, nichts Engelten, als vor an disem brief geschriben ist, Der zw Nûrnberig gebenn ist an sannd Urbans tag, do man zallt von Kristus gepurtt drew zechen hundert jar vnd in dem ainen vnd dreissigistenn Jarenn.

Source Fulltext: OÖUB 6 (Wien 1972), S. 21ff., Nr. 18