JCH Alber von volchenstorf vnd Jch Margret sein Housvrow vnd all vnser Erben vergehen offenbar an disem brief vnd tuen chvnt Allen den, die in sehent, lesent vnd horent lesen, Daz wier dem Edeln Herren Hern Eberharten von walsse zden zeiten Lantrichter ob der Ens vnd allen seinen erben gelten schullen dreu Hundert phunt wienner pfenning vnd haben sev der selben pfenning drithalb hvndert phunt recht vnd redleich gewert vnd geweiset ouf vnserm Hous datz vorchtenberch vnd ouf Alle dev, vnd dor zue gehort, versucht vnd vnuersuecht, wie daz genant ist, daz alles vnser satz gewesen ist von wernharten dem Mezzenpechen vnd mit allen den rechten, die wier dor ouf gehabt haben. Wier haben sev ouch viertzig phunt gewert vnd geweiset ouf den gu^eten in dem viechtwang, die vns von wernharten dem Mezzenpechen stend, der dreutzehene sind vnd die genant sint datz den hueben, gestifte vnd vngestifte. Wier vergehen ouch, daz wier in andern vorgenannten Hous alle dev recht geben, di wier dor an haben vnd schullen ouch des vnd der vorgenanten red ier gwer sein vor recht vnd an aller der stat, da in sein durft geschieht, vnd dor uber ze vrchund vnd ze einer bestetigung diser wandlung gib ich Alber von volchenstorf in disen offen brief versygelten mit meinem anhangvndem Insygel. Der brief ist geben datz den Wasen nach Christes gebu^erd dreutzehen hvndert iar, dor nach in dem Aim vnd dreizzigistem iar an dem pfingst tag.

Source Fulltext: OÖUB 6 (Wien 1972), S. 20, Nr. 17