Wir Ludweig Von gotes Gnaden Romischer Kayser aw Allen Zeiten mera^er des Reichs Tun chund mit dem Brif Allen den, die in sehent, horent oder lesent, daz fur vnser kaiserleich may\eestat chomen sind die edelen Hainrich, Wernhart vnd Fridreich gebrüder Grafen zw Schawnberch Vnser vnd des heyligen Reichs getreue vnd habent vns diemvtichlich gebeten, daz wir in vnd iren erben jer hantfest vnd brif, die si u^eber ir recht, genad vnd freyhait Vnd vber ander sa^ech Von saliger gedaehtnuzz Römischen Kaysern vnd Chunigen vnsren voruodern vnd auch von dem heyligen Reich erworben vnd herpracht haben, Bestatigen, beuesten vnd confirmieren von sunderlichen vnsern kaiserlichen genaden, des haben wier an gesehen ir redlich vnd vernuftig gebet Vnd ir merchleich getrew dinst Vnd ere, die si vns vnd dem heyligen Reich offt vnuerdrozzenlich getan vnd erboten habent Vnd sta^etichlich mit gantzen trewen erczaigent, Vnd bestätigen, beuesten vnd confirmieren wir in vnd iren erben Alle hantfest, brief vnd schrift, damit si von Romischen Kaysern vnd Chunigen vnsern voruoderen begnadet vnd von ieren eltern ansi chomen sind vber alle ir Recht, freyhait, genad vnd gutew gewonhait, wie man die von sundern warten genennen mag, in allen iren mainvngen, Punten vnd Artikelen, als si begriffen vnd geschriben sind, Als ob si von wart ze wart hie geschriben wa^eren. Auch haben wir den edelen vorgenanten Hainreich, Werenhart vnd Fridreichen gebru^edern grafen von Scha^ewnberg vnd iren erben sunder genad getan mit vnsrer kaiserlichen maygestat, Daz wir in leichen vnd verliehen haben mit dem brif Alle die Gueter vnd alle die recht, di si vnd ier vo^erderen von dem Reich vo^erher gehabt habent. Vnd tu^en auch den Edelen vorgenanten Hainreich, Wernharten vnd Fridreichen gebrudern grafen zw^e Schawnberg vnd ieren erben di genad mit dem brif von vnserm kaiserleichen gewalt, Daz si den pan haben sullen vnd mugen den verleichen allen den Richtern, die si in ieren gerichten habent, Vnd auch allen den Richtern, die di gericht habent, die lechen von in sind Also, daz si hincz allen schedleichen la^ewten gerichten mvgen vnd sullen Nach des landes Recht. Auch haben wir den edeln vo^ergenanten Hainreich, Wernharten vnd Fridreichen gebrudern Grafen zw^e scha^ewnberch vnd iren Erben di genade getan von vnserm kaiserlichen gewalt vnd tu^en in auch di mit dem brif, daz si an irr mawt zw^e aschach die Ma^ewtt woll genemen mv^egen awz dem podem, von dem weiten pant dez Salcz ye von aim phunt chuffen salcz des weiten pantz Aindlef phunt wienner phenig Vnd von aim phunt chu^efflein salcz des chlain pantz sechs schilling wienner phenig vnd ie von aim fu^eder weins zwen vnd dreyzzik phenig vnd ie von aim dreyling weins vir vnd zwainczik phenig allez wienner mvnzz zw^e maw^et an alle andrew^e gult, wie die genant ist, die si auf ierr egenanten Mawtt zw^e Aschach habent vnd geuallen sol, daz wol wizzenleich ist. Si mv^egn auch di selb ier egenant mawtt wol genemen auf ieren grunten, wo sie dez aller pest verlust. Die sach alle, alz die vor benant vnd verschriben ist, die besta^etigen, beuesten vnd Confirmieren wir jn vnd iren erben mit dem brif von sunderlichen vnsern kaiserlichen genadn, wie man die genennen mag, in allen ieren punten vnd artikeln, alz si von wort zw^e wart begriffen vnd geschrieben sind. Vnd dar vber zw^e vrchund geben wir in den brif versigelten mit vnserm kaiserlichen Insiegel, Der geben ist zw^e Munichen an sand Walpurg Tag, da man zalt von Christes geburd Drewczechenhundert iar, darnach in dem ayn vnd dreyzzikisten ia^er, jn dem Sibentzehenden Jar vnsrs Reichs vnd in dem virden des kaisertu^emb.

Source Fulltext: OÖUB 6 (Wien 1972), S. 18f., Nr. 16