Ich Vlrich der Chnolle burger ze Welcz, frawe Kathrine mein häusfrawe, Kathrine mein tohter, Chvenigunt mein tohter vnd V^olrich mein sun vergehen offenlich an disen brief fuer vns vnd fuer alle vnser erben, daz wir vnser haus ze Welcz verchauft habn vnd ze chauffen gebn vnserm herren byschof Chv^onraden von Freysing vnd seinem goczhaus reht vnd redlich mit allem dem so dar zu^o gehoert vnd von alter her gehoert hat, vnd den garten vnd die zwo hofstet die da zv^o gehoernt, die hinden an minen garten vnd a(n) meinen pavmgarten stozzent, besu^ocht vnd vnbesu^ocht, vnd dev hofstat mit dem pachouen vnd dev stuben, dev zu dem pachouen gehoert, deu vor dem vorgenantem meinem haus ze naehst gelegen ist, vnd han dar vmb enphangen von meinem herren zwo vnd fuenfzich march gewegens silbers der ich von im vnd von seinem goczhaus an beraitem gu^ot gar vnd gaenczlich gewert bin; ich vnd mein erben, vnd verzeihen vns, ich vnd mein erben vnd mein vorgenant hausfrawe alles des rehten so wir hetten oder han mohten an dem vorgenanten haus vnd an garten vnd an hofsteten gar vnd gaenczlich, vnd ze vrchuende habn ich vnd mein hausfraw vnd mein vorgenanten erben gebn disen brief.vnserm vorgenanten herren byschof Chu^onraten vnd seinem gotshaus versigelt mit meinem insigel vnd mit hern Emchen von Alczaey chorherren ze Freysing vnd prost ze Werthse insigel vnd mit der stat ze Welcz insigel. Ich Emch von Alczaey chorherre ze Freysing vnd prost ze Werthse vergihe, daz ich durch Vlr. des Chnollen, frowen Kathreinen seiner hausfrawen vnd seiner vorgenanten erben fleizzigev bet mein insigel gelegt han ze vrchuende an disem brief. Ich Berchtolt der rihter vnd wir dev gemain der burger der stat ze Weltz vergehen offenlich an disem brief daz wir vnsrer stat insigel durch bet V^olr. des Chnollen burger ze Welcz, frawen Kathrinen seiner hausfrawen vnd seiner vorgenanten erben ze einem vrchuend gelegt habn an disen brief. Ditz ist beschehen vnd ist der brief gebn ze Welcz do man zalt von Christes geburtt drevczehn hundert iar vnd dar nach in dem drey vnd drizzigisten (!) iar, an dem Mitiken vor sand Georij tag.

Source Fulltext: ZAHN, Codex Diplomaticus (=FRA II/35, Wien 1871) S. 202-203