In nomine domini amen. Nos Marquardus miseracione diuina decanus totumque capitulum ecclesie Intycensis presentibus confitemur et ad vniuersorum noticiam cupimus peruenire, quod nos propter multimodam graciam ac diuersas promociones per reuerendum in Christo patrem ac dominum nostrum karissimum, dominum Chu^onradum venerabilem episcopum Frisingensem predicte nostre ecclesie Intycensi ac dicto nostro capitulo exhibitas et impensas sui memoriam in nostris oracionibus habere volumus pro tempore vite sue quam pater celestis longeuam faciat in presenti et felicem} beatam ac perpetuam in futuro, post mortem vero ipsius anniuersarium diem sui obitus missis, vigiliis ceterisque deuotis et humilibus nostris obsecracionibus volumus, immo et firmiter promittimus semel in anno, tamen annuatim perpetuo deuotissime peragendum, addita quolibet anno vna libra Veronensium paruulorum quam in suo anniuersario scolaribus ac pauperibus ob sue anime salutem volumus elargiri. In cuius rei euidenciam perpetuam ac munimen presentes nostri capituli pendenti sigillo duximus consignandus. Scriptum et actum in choro Inticensi, anno domini millesimo trecentesimo vigesimo octauo, in vesperis Primi et Feliciani martirum beatorum.

Source Fulltext: ZAHN, Codex Diplomaticus (=FRA II/35, Wien 1871) S. 169-170