In gots namen amen. Wir Chu^onrat der Schreiber purger ze Wazzerburch, Dymuet mein hausfraw, Elsbeth vnd Chu^onrat vnsereu chinder veriehen vnd tun chunt allen den die disen brief sent, hoerent oder lesent, daz wir von vnsern herren den chorherren vnd allem dem capitel von dem tu^om ze Freysing chauft haben vmb vier hundert pfunt Muncher pfenning zu^o vnser aller vier leb zue einem rechten leibgeding dreizzich march Perner geltz Meraner muenz di ze der zeit gib vnd gaeb sint, vnd die selben dreizzich march schol man vens oder vnsern boten all iar geben an sant Marteins tach vnuerzogenleichen von irm gu^ot auf Layan in dem gepirg vnd von allen dem daz dar zue gehoert, vnd schullen wir auch an dem selben guet weder von stift, noch von chainerlai ding anders chain recht haben, wann daz wir den vor geschriben gelt schullen in nemen vntz an vnsern toed. Wenn wir auch nimer sein so hat chain vnser erb chain recht mer an dem vor geschriben gelt, wann er schol dann ledich sein vnsern vor genanten herren von Freysing vnd irm goczhaus gar vnd gaentzleichen an all widerred. Ist aber daz vns chain abganch oder gebrest geschiht an dem vor geschriben gelt von welicher lai sach daz waer, den schullent si vns ab tuen vnd wider legen von allen dem daz si in dem gepirg vnd hie aussen habent, als lang vnd als verr biz wir hauptguetz vnd schadens gar vnd gaentzleichen gewert werden in allen den rechten vnd vnser hantfest saget, di wir von den vor geschriben chorherren von Freysing vnd von dem capitel inne haben; Dar veber haben wir in geben ze einem verchuend disen gagen (!) brief versigelt mit meinem dez vorgenanten Chunratz dez Schreibers insigel der geben ist ze Wazzerburch do man zalt von Christes gepurt dreuzehenhundert iar, dar nach in dem acht vnd zwayntzigisten iar, dez Freitages nach sant Walburgen tach.

Source Fulltext: ZAHN, Codex Diplomaticus (=FRA II/35, Wien 1871) S. 164-165