Ich^a Burckart von Mannsperg¹ ritter der durluchtigen hochgepornen fursten miner gnedigen herschaft||
von Osterrich landuogt tun kunt aller menglichem, dz uf hutigen tag fur mich komen ist der erber||
bescheiden Hanns Homburger von Rapreswile² an stat vnd in namen vnd ouch in tragers wise Margrethen||
wilent Heinrich Russingers seligen von Rapreswil elichen tochter vnd hat mich diemutiklich vnd ouch ernstlich gebetten, dz ich im an der egenanten miner herschaft statt zu der vorgenanten Margrethen handen als irem trager geruch ze lihen den zehenden ze Gerlisperg³ mit aller zugehorde, den der obgenante Heinrich Russinger selig ir vatter, von dem er sy in erbs wise angeuallen were, by sinem leben von der obgenanten miner^b ze lehen gehept hat, vnd von solicher siner ernstlichen bette, die ich herumb erhort hab, vnd och von getruwer dienst wegen, so derselb Homburger miner herschaft oft getan hat vnd noch teglichs tut, so hab ich im als einem lehentrager zu der egenanten tochter handen in namen miner obgenanten herschaft von Osterrich von des gewaltz wegen, den ich in solichen vnd in meren sachen von iren gnaden hab, den obgenanten zehenden ze Gerlisperg, als er von miner herschaft lehen ist, mit allen rechten vnd zugehorden, als in der egenempt Russinger selig vormals gehept hat, verlihen vnd lihe im wissentlich mit kraft dis briefs, wz ich im von rechtz wegen daran ze lihen hab, also dz er an der egenanten tochter statt als ein trager vnd nach irem tod ir erben, die des lehens gnosz sind, dasselb lehen mit allen rechten vnd zugehorden hinfur in lehenswise von der obgenanten miner herschaft innehaben nutzen vnd niessen sollent nach lehens vnd landes recht, doch derselben miner herschaft ire rechtung der lehenschaft behalten vnd inen daran vnschedlich vnd ouch also, dz der egenant lehentrager miner herschaft dauon getruw gehorsam vnd gewertig sy ze tund, als ein lehentrager sinem herren von den lehen billich tun sol. Mit vrkund dis briefs, der mit minem hangenden insigel versigelt vnd Zurich geben ist an der nechsten mittichen vor sand Martins tag nach Crists geburt vierzehenhundert jar vnd darnach in dem einliften jar.