Ich^a Haintz Mayer der alt von Mowyler¹ vnd wir disiv hienachbenempten siniv kind Haintz, Ruf, Claus, Bentz, Cuntz, Hans vnd Anna vergehen||
offenlich an disem brief fur vns vnd fur all vnser erben vnd tugen kund aller menglich, alz wir da gebiven vnd gemacht haben ditz nach||
benempt wyer mit namen den wyer genant der Horlohwyer², stost an den wald genant Rotawald², den wyer im Vokenmos² genant der||
Kolbrunner², den wyer in dem Riettmos², och den wyer genant der Schnaittwyer² vnd den wyer darob vnd die zwen behalter hinder dem hus, da bekennen wir in craft ditz briefs, daz vnser gnadigiv frow frow Margrett div Surgin Hainrich des Surgen³ saligen elichiv wittwe, der wir mit lib recht aigen syen, sy vnd iriv kind vnd erben an den obgenanten wyern mitt ainander ainer rechten gemaind versprochen haben vnd versprechen mit disem brief, die selben wyer mit aller zugehord in rechter redlicher gemaind wys mit ainander inn ze haben vnd ze niessen, also daz ain tail daran nit me han sol denn alz der ander ân all geuerd, vnd ouch in solicher wys vnd mausz, daz disiv gemaind nit anders soit noch sin sol denn mir vorgenantem Haintzen Mayer dem alten vnd minen kinden, so da vor an disem brief benemmet sind, vnd doch also vnd mit solicher beschaidenhait, wenn daz ist, daz ich vorgenanter Haintz Mayer der alt vnd div obgenanten miniv kind alliv samen von todes wegen abgangen syen, daz gott lang wend, so sond denn der obgenanten Margretten Surgin vnd iren kinden vnd allen iren erben die vorgenanten wyer ze Mowyler mit aller zugehord zu iren handen veruallen sin aller ding ledig vnd los ân menglichs irrung, vnd denn darnach sol der brief, so wir von der gemaind wegen innhaben, ab vnd tod haissen vnd sin. War ouch, daz ich vorgenanter Haintz Mayer der alt oder wir vorgenanten siniv kind vnser ains oder me von in zugan vnd ainen andern schirm an vns namen hinder dehainen andern herren oder frowen gaistlich oder weltlich oder dz wir burger in ainer statt wurdin oder wie vnd in welich wyse wir ainen andern schirm an vns namen denn die obgenanten Margretten Surgin vnd iriv kind, so sol denn ich vorgenanter Haintz Mayer der alt vnd wir div vorgenanten siniv kind, die daz also tatten vnd also fluchsam wurdin, die sond denn dannenthin dehainen tail an den vorgenanten wyern nit me han in dehainen weg, vnd sol denn der selb tail, souil alz dem geburt haut, daz also fluchsam wurd, der obgenanten Margretten Surgin vnd iren erben verfallen sin vnd haimgan ân all irrung. War ouch, daz ich vorgenanter Haintz Mayer der alt selb also vberfur vnd fluchsam wurd, so sol denn der obgenanten miner frowen der Surgin vnd iren erben der obgenant min tail vnd der kind tail alles samen zu iren handen verfallen sin, daz ich noch miniv kind denn darnach mit den wyern nutz me ze tund haben sullen in dehainen weg. Vnd des ze vrkund so haben wir erbetten die ersamen Clausen Stoss⁴ burgermaister vnd Hansen Zuricher stattamman ze Rauenspurg⁵, dz si iriv insigel in selb ân schaden fur vns vnd vnser erben offenlich gehenkt hand an disen brief. Der geben ist an mentag vor sant Michels tag nach Cristi geburt vierzehenhundert jaur, darnach in dem ainliften jaur.