Wir^a Cun von gotz gnaden abt des gotzhus ze sant Gallen, das an alles mittel zu gehort dem stul ze Rom, tund kund vnd manglichem ze||
wissenn mit disem brief, das fur vns kam der ersam priester herr Hans Kummer lutpriester ze disen ziten ze Huntwil ze sant Gallen vff||
vnserm hus, vnd kament mit im des spitals des haligen gaistes pfleger ze sant Gallen, vnd offnat der selb herr Hans vor vns, wie dz||
er vnd Clara sin elichi muter vnd Agnes sin elichi swoster allu von vnserm vorgenanten gotzhus vnd vns ze lehen hettint den wingarten genempt am Bul, ze Luchingen im Marpach¹ gelegen, stoss ze ainer syten an des selben spitals wingarten vnd stoss ze der andren siten an maister Hansen des Schedlers schulmaisters ze sant Gallen der kinden da selbund wingarten, der von dem getailt sy, mit grund vnd mit grat vnd mit aller zu gehord, vnd den selben wingarten mit siner zu gehord hetti er fur sich vnd Claren sin elichen muter vnd Agnesen sin elichu swoster vnd alle ir erben des vorgedahten spitals^b pfleger zu des selben spitals handen ze koffenn geben ains ewigen staten vnd vnwiderruffentlichen koffes ze koffenn geben vmb viertzig vnd ain pfund pfenning guter Costentzer muns, dero si gantzlich von inen gewert warint, vnd gab vns do ze mal der selb herr Hans der Kummer in namen vnd an statt sin selbs, Claren siner elichen muter vnd Agnesen siner elichen swoster vnd fur alle iro erben den vorgeschribnen wingarten mit sinen zu gehorden ledklich vnd frylich vff an vnser hand vnd batt vns ernstlich, das wir von gnaden den vorgeschribnen wingarten mit sinen zu gehorden lihint in tragers wis ze lehen dem beschaidenn Johansen Varnbuler burger ze sant Gallen zu des egedahten spitals handen. Darvmb erhortant wir do des vorgenanten herr Hansen bett gnadklich vnd lihent do ze stund vnd lîhent mit disem brief dem egenempten Johansen Varnbuler den vorgenempten vnd geschribnen wingarten mit siner zu gehord zu des vorgeschribnen spitals handen in tragers wis ze lehen, was wir im daran durch reht lihen sont, vnserm vorgenanten gotzhus vns vnd vnsern nahkomen an vnserm zehenden vsser dem selben wingarten gantzlich vnschadlich vnd an andern rehten vnd gewonhaiten och vnschadlich vnd vnuergriffenlich. Vnd des ze offnem vnd warem vrkund dirr vorgenanter ding habent wir vnser abtye insigel offenlich haissen henken an disen brief. Darnach vergih ich her Hans der Kummer lupriester ze Huntwil ze disen ziten fur mich vnd Claren min elichen muter vnd Agnesen min elichen swoster vnd fur alle vnser erben, die wir hierzu vestenklich bindent, ain gantz warhait alles des, so an disen brief vorgeschriben stat von mir vnd den obgenanten miner muter vnd^c swoster elichen, vnd darvmb, dz dis alles war stat vest vnd vnwandelber vmb den koff des vorgenanten wingarten mit siner zu gehord von mir, Claren miner elichen muter, Agnesen miner elichen swoster vnd vnser erben gantz vnd vnuerrukt belib, so han ich min aigen insigel fur mich vnd die obgenanten Claren min elich muter vnd Agnesen min elich swoster vnd fur alle vnser erben offenlich gehenkt an disen brief. Der geben ist ze sant Gallen in dem jar, do man zalt von Cristi geburt vierzehenhundert jar vnd darnach in dem ainlefften jar, an dem nahsten zinstag vor sant Matheus tag.