Wir Fridrich uon gottes gnaden hertzog zu Osterrich¹ zu Stir zu Kernden vnd ze Krain graf zu Tyrol etc. tun kunt, als wilent der hochgeborn furst vnser lieber herre vnd vatter hertzog Leupolt² loplicher gedachtnuß den leuten ze Ottikon³ vnd ze Sefi⁴ fur sich vnd sin erben uerhaissen vnd uersprochen hat, das er si vnd die hof, darin si gehoren, im selber behaben woll ewiklichen, vnd sulle si furbasser nyeman uerlihen noch uersetzen, also haben wir in ouch gelopt vnd uersprochen fur vns vnd fur den hochgebornen fursten vnsern lieben bruder hertzog Ernsten⁵ vnd vnser erben, das wir die uorgenanten hof ze Ottikan vnd ze Sefi vnd die lute, die darin gehorent, wollen vnd sullen by vnsselber beheben vnd behalten ewiklich vnd si niemant uerlihen noch uersetzen, darzu sullen si furbasser ewiklich warten vnd gehoren gen Rapperswil⁶, die wyle Rapperswil zu vnsern handen steet, vnd sullen si ouch die uon Rapperswil schiermen vnd halten by allen rechten gnaden vnd fryhaiten, die si von alter haben herbracht oder die wir in noch hinach tun vnd geben. Mit vrkund ditz briefs. Geben ze Baden⁷ an sant Johanns tag ze sunegichten nach Crists gepurt viertzehenhundert jare, darnach in dem aindleften jare.