Ich^a Hainrich von Schellenberg¹ tun kund fur mich vnd all min erben vnd vergich offenlich mit disem brief allen den, die in an sahend lesend oder ymmer mer gehorend lesen, daz ich mit gutem wolbedachtem sinn vnd mut mit guter zittiger vorbetrachtung gesundes libes vnd mutes ze den ziten vnd an den stetten, do ich daz wol getun kond||
vnd mocht, mit allen den worten vnd werken raten vnd getaten, so von alter von gewonhait oder von rechtz wegen dar zu nutz vnd notdurftig waren, vnd wie dz nu vnd hie nauch ewenklichen ymmer mer wol kraft vnd macht het vnd haben sol vnd mag, dem fromen vesten Hainrichen Vogt vom Lutpoltz² von Sumerow³ vnd allen sinen erben recht vnd||
redlich ains statten ewigen immerwerenden kouffes verkouft vnd ze kouffend geben han die vesty Brastberg⁴ burg vnd berg burggsass vnd burgstal fur recht burggsass gen sant Gallen tobel vnd graben mit aller zugehord mit sampt disen nauchbenempten guten vnd jarlichen zinssen, die dar in vnd darzu gehorend. Item||
des ersten den buw hoff, den klainen zehenden mit sampt den fran welden, die in die burg gehorend mit aller zugehord. Item den hoff ze der strauss, den Steffen buwt vnd der jarlich gilt zwai pfund acht schilling Kostentzer pfenning, fier malter habern, sechs fiertal kernen vnd fier hunr. Item dz gut zem Jungholtz⁵, das Steffan buwt, dz jarlich gilt ain pfunt pfenning, zway fiertal kernen vnd sechs hunr. Item den wiger im Rempen⁶ mit aller zugehord, ez sig an wasser, an wassers flussen dar vss vnd dar in, mit vff fahend, mit abland, nutz vssgenomen. Item dz gut in der Ow⁷, dz Mangolt buwt, dz jarlich gilt sechs pfund pfenning. Item daz gut in der Berlis ow⁸ vnd daz gut in den Eggen⁹, die Hans Weber buwt, die jarlich geltend drythalb pfund pfenning, fier malter habern vnd sechs hunr. Item den hoff ze der Staig¹⁰, den Rek buwt, gilt jarlich ain pfund pfenning, sechs schoffel habern, zway fiertal kernen vnd fier hunr. Item die gut im Loch¹¹ vnd ze der Wiss¹², die der Nussbomer vnd sinr tochterman buwend, geltend jarlich funf pfund pfenning vnd zwaintzig hunr. Item den Lochbach¹³, der vss dem Rempen gaut, mit aller siner zugehord. Item daz stuk an der Argen¹⁴ vnder burg. Item dz gut zem Gysenberg¹⁵ vnd den Kampfaker¹⁶, dz der Walch buwt, gilt jarlich funf vnd dryssig schilling pfennig, zway malter habern, fier fiertal kernen vnd fier hunr. Item den jarzoll vff dem Kampfaker, der jarlich gilt fier pfund pfenning. Item den obern sew ze Swartzensew¹⁷ genant Brastbergs Sew, mit sampt dem moss vnd dem bach, mit aller ir zugehord. Item dz gut ze dem obren Herfatz¹⁸, ze der Trift¹⁹ vnd ze der Lutishalden²⁰, die Bubersch buwt vnd jarlich geltend sechsthalb pfund pfenning, zway malter habern, zway fiertal kernen vnd zehen hunr. Item der Wermaister wiss genant an der Mussen²¹, gilt jarlich ain pfund, zwen schilling pfenning. Item die gut ze den Hofen²², die der Hass buwt, geltend jarlich zwen vnd dryssig schilling pfenning, zwai malter habern, zway fiertel kernen vnd fier hunr. Item daz gut zem Funfer²³, daz Rossnagel buwt, dz jarlich gilt ain pfund pfenning, zway malter habern, zwai fiertal kernen, zwai tail des kornzehenden vnd fier hunr. Item vss Hoturs gut, genant ze der Hofstat²⁴, sechs schilling pfenning vnd ain malter habern vnd nit me. Item dz gut ze Rorimoss²⁵, dz jarlich gilt ain pfund pfenning, sechs schoffel habern, dru fiertal kernen, fier hunr vnd dryssig ayer. Item dz gut ze Eppenberg²⁶, dz Swigger Holl buwt, gilt jarlich ain pfund pfenning vnd fier hunr. Item vss des Wachters wiger ym Rekentobel²⁷ ain pfund pfenning. Item vss dem gut zem Nussbom²⁸ sechs fiertal habern ze vogtfuter vnd dru hunr. Item vss dem gut zem Hungerhuss²⁹ siben fiertal habern vogtfuter vnd dru hunr. Item die gut zem Wiler³⁰ ze Swalmenberg³¹ vnd zem Huss³², die Endress Mark buwt, die jarlich geltend zwai pfund pfenning, zway malter vnd dru fiertal habern, fier fiertal kernen, funf fiertal habern ze vogtfuter vnd zehen hunr. Item dz gut ze dem Rutstok³³ vnd dz Becherlehen, die Ruff Kratt buwt, geltend jarlich ain pfund pfenning, dru malter habern, acht fiertal kernen vnd zwelf hunr. Item dz gut ze Bruntzenberg³⁴, dz Slichting buwt, gilt jarlich ain pfund pfenning. Item dz gut zem Husslin³⁵, dz die Tyserin buwt, gilt jarlich ain pfund pfenning, ainen schoffel habern vnd fier hunr. Item des Schedlers gut, dz die Rietterin buwt, gilt jarlich ain pfund pfenning, zway malter habern vnd fier hunr. Item von den laymgruben zehen schilling pfenning. Item daz gut ze Goldbach³⁶, daz Peter von Goldbach buwt, gilt jarlich ain pfund pfenning, dru malter habern, zway fiertal kernen vnd sechs hunr. Item daz gut in der Grub³⁷ vnd der Oschinen gut, die Stob buwt, geltend jarlich zway pfund pfenning, dru malter habern, acht fiertal kernen vnd zehen hunr. Item daz moss ze Goldbach, daz Schradi Oschibach buwt, gilt jarlich fier pfund pfenning. Item daz gut vff dem berg, dz die Gissler buwent, gilt jarlich zway pfund pfenning, fier malter habern, ain fiertal kernen, sechs hunr vnd sechtzig ayer, vnd ouch alles samend Wanger³⁸ mess vnd ouch gutz redlichs, vngefarlichs korns. Item vnd dar zu die fischentzen ym Giesswald³⁹ mit ir zugehord, nutz vssgenomen, vnd also han ich ym vnd sinen erben die vorgenanten vesti Brastberg burg vnd berg burgstal vnd burgsass tobel vnd graben mit aller zugehord mit sampt den vorgenanten guten jarlichen zinssen vnd zahenden wigern vnd wassern mit sampt den fran welden mit aller zugehord, als vorgeschriben staut, recht vnd redlich ains statten ewigen kouffes gegeben vnd gib inen ouch dz alles in kraft vnd macht ditz briefs mit allen nutzzen sturan diensten gwaltsaminen fryghaiten gewonhaiten rechtungen vnd rechten, so von alter von gwonhait oder von rechtz wegen dar in vnd dar zu vber all iendert gehorend, ez sig an ehaftinen an zwingen an bennen an sturan an zinssen an diensten an akern an wisen an wasen an zwi an holtz an veld an witt an wunn an waid an tratt an weg an stag an rutinen an egerden an owen an brulen an weiden an wasser stenden vnd fliessenden an wassers flussen, ez sig ob erd vnder erd besuchtz vnd vnbesuchtz ze besetzzend vnd ze entsetzzend oder wie dz denn alles genant oder gehaissen ist, ez sig benempt oder vnbenempt, ez sig funden oder ez werd noch funden gar vnd gentzlich nutz vssgenomen, vnd ouch fur recht ledig vnd vnuerkumbert, vssgenomen der Hoturmen gut, dar vss si souil zinss sond han, als vorgeschriben staut, vnd nit me, vnd ouch vssgenomen etlicher gut, dar vss die satzz vormauls verkouft sind, vnd ouch vssgenomen etlicher gut, die ze jarzalen vormauls verlihen sind, wa dz vormauls beschehen ist vnd die selben brief dar vmb hand, da bi sol er vnd sin erben die laussen beliben nauch ir brief lut vnd sag an all geferd, vnd ouch fur recht lehen von dem erwirdigen dem gotzhuss von sant Gallen, dannan ich ym ouch dz alles gefertigot vnd mit der lehenschaft in sin hand vnd gwalt braucht han, wie im nutz vnd notdurftig ist vnd wie dz nu vnd hie nauch wol kraft vnd macht hett vnd haben sol vnd mag. Vnd also sond ouch der vorgenant Hainrich Vogt vom Lutpoltz vnd sin erben die vorgenanten vesti Brastberg burg vnd berg burgstal vnd burgsass tobel vnd graben buw hoff fran weld klain zehenden, die in die burg gehorend, mit sampt den vorgenanten jarlichen zinssen wassern vnd guten mit aller zugehord nutz vssgenomen, als vorgeschriben staut, nu furbas hin ewenklichen ymmer mer geruwklich niessen inne han vnd han besetzzen vnd entsetzzen vnd iren nutz vnd fromen da mit werben schaffen vnd tun, wie in wol fugt, ane min vnd aller miner erben vnd allermenglichs von vnser wegen irrung ansprach vnd wider red, also dz weder ich noch min erben noch niemand von vnser wegen den egenanten Hainrichen Vogt noch sin erben noch niemand von iro wegen an den vorgenanten stuken vnd guten allen gemainlich noch an dehainem besunder, als die da vorgenant vnd geschriben sind, furbas ewenklichen nymmer mer gesumen geirren bekumbern noch bekrenken sollen mogen noch wellen mit kaim gericht weder gaistlichem noch weltlichem deweder mit worten noch mit werken mit raten noch mit getaten weder haimlich noch offenlich noch schaffen getan suss noch so in kainen weg von kains des rechten wegen, so ich bis vff hut disen tag, als dirre brief geben ist, ie dar zu gehebt han oder ich oder min erben oder iemand von vnser wegen noch furo dar zu gehaben solten oder mochten, wie sich des iemand ietzo oder hie nauch in ziten erdenken mocht, nutz vssgenomen in kainen weg, da mit wir disen kouff abgetriben geirren gebrechen oder bekrenken mochten gentzlich nutz vssgenomen. Dar vmb vnd da fur er mir also bar gegeben gewert vnd bezalt hett zway tusend sechs vnd sechtzig pfund vnd drytzehen schilling alles guter genger vnd geber Kostentzer pfenning, die ouch alle samend in minen bessern nutz vnd fromen anderswa komen vnd bewent sind, vnd also sollen ouch ich vnd all min erben des egenanten Hainrichen Vogtes vnd siner erben vmb die vorgenanten vesti Brastberg burg vnd berg burgstal burgsass tobel vnd graben buwhoff klain zehenden fran weld mit sampt den vorgenanten jarlichen zinsen wassern vnd guten mit aller zugehord, als vorgeschriben staut, vnd diss koufs ir recht redlich gweren haissen vnd sin nauch lehens recht vnd nauch dem rechten. Vnd des ze merer vnd besser sicherhait so han ich ym vnd sinen erben zu mir vnd minen erben dar vmb ze rechten redlichen vnuerschaidenlichen gweren geben vnd gesetzt die fromen vesten Walthern von Kungsegg⁴⁰ minen lieben ohen, Josen von Vtenrieden⁴¹, Vlrichen von Kungsegg⁴², Vlrichen von Haymenhofen⁴³ vnd Petern von Hochnegg⁴⁴, mit der beschaidenhait, ob im oder sinen erben die vorgenant vesti Brastperg, burg oder berg, burgstal burgsass tobel oder grab oder kain ir zugehord mit sampt den vorgenanten guten, jarlichen zinssen vnd zehenden, wigern vnd wassern mit sampt den fran welden, mit aller zugehord, als vorgeschriben staut, gar oder ain tail von iemand angesprochen oder abbehebt wurd mit dem rechten, vor vnd e si dz alles gemainlich vnd ieglich stuk besunder inne gehebt genossen vnd besessen hettind nauch lehens recht vnd nauch dem rechten, da sollen ich vnd die vorgenanten gweren vnd vnser aller erben gemainlich den egenanten Hainrichen Vogt vom Lutpoltz vnd all sin erben vmb vertretten versprechen vnd verstan gen allen luten vnd gerichten, gaistlichen vnd weltlichen, wa vnd wenn vnd wie dik si des notdurftig sind oder werdent, vnd inen dz alles allwegen ledig vnd loss richtig vnd vnansprachig machen nauch lehens recht vnd nach dem rechten vnd ouch allwegen gar vnd gentzlich, an allen iren schaden. Wa wir des bi ir ersten vordrung vnuerzogenlich nit entatind, so hand der egenant Hainrich Vogt vom Lutpoltz vnd sin erben vnd all ir helfer vollen gwalt fryges vrloub vnd gut recht, mich egenanten Hainrichen von Schellenberg vnd die vorgenanten gweren vnd vnser aller erben gemainlich vnd vnuerschaidenlich oder ainen oder mer vnder vns besunder, welen si wend, dar vmb anzegriffend ze notend vnd ze pfendent mit gericht vnd ane gericht an allen vnsren luten vnd guten ligenden vnd farenden, wa si die vinden vnd ankomen mogend, ez sig in gerichten oder vsserhalb gerichten, wie vnd wa vnd wa hin si allerbest konnend mogend oder wend, als dik als vil vnd als gnug, bis inen dz alles alle ding richtig ledig vnd loss vnd vnansprachig vnd dar zu aller der schad, den si des genomen hettind, vssgericht gewert vnd bezalt worden ist, gar vnd gentzlich an allen iren schaden, vnd ensol ouch weder mich noch die egenanten gweren noch vnser aller erben weder vnser lut noch vnser gut da vor nit schirmen behelfen bedeken noch befrygen kain gericht weder gaistlichs noch weltlichs dehain gesellschaft puntnuss lantfrid lantrecht fryghait noch recht der herren noch der stett noch gemainlich dehain sach furzog noch fund, den wir oder vnser erben gemainlich oder besunder da wider gehaben soltind oder mochtind, wie sich des iemand ietzo oder hie nauch in ziten erdenken mocht nutz vssgenomen in kainen weg. War ouch, ob dirre brief ienand busswirdig oder gebresthaft wurd oder ietzo war, ez war an permit an geschrift an artikeln, oder ob daz war, das der insigel ains oder mer, so an disen brief gehorend, nit dar an gehenkt misskert oder zerbrochen wurd, oder wie sich dz gefugty, dz dirre brief busswirdig oder gebresthaft gehaissen wurd oder wer, das alles ensol dem obgenanten Hainrichen Vogt vom Lutpoltz noch sinen erben an disem statten ewigen kouff noch an dehainen vor vnd nachgeschribnen sachen kainen schaden kumber noch gebresten bringen noch beren in dehain wiss noch in kainen weg, also daz dirre brief nymmer ain verlegner, vnnutzzer brief gehaissen noch gesin sol, alle die wile vnd der insigel ains oder mer an disem brief gantz ist, an geferd. Ich obgenanter Hainrich von Schellenberg glob fur mich vnd min erben, die vorgenanten gweren vnd all ir erben von dirre gwerschaft ze ledigend vnd ze losend an allen iren schaden iren worten vmb den schaden ze gloubend an ayd. Vnd des alles ze warem vnd offnem vrkund vnd stater ewiger sicherhait so han ich min aigen insigel fur mich vnd all min erben offenlich gehenkt an disen brief. Wir die obgenanten gweren veriehen dirre gwerschaft in aller der wiss vnd mauss, als hie vor von vns geschriben staut, vnd globind die fur vns vnd vnser erben also ze haltend vnd der gnug ze tund getruwlich an all argelist vnd geferde. Vnd des alles ze warem vnd offnem vrkund vnd stater ewiger sicherhait so haben wir vnsru aignu insigel fur vns vnd all vnser erben ouch offenlich gehenkt an disen brief. Der geben ist an sant Valentis tag nauch Cristi geburt fiertzehenhundert jar vnd dar nauch in dem ainliften jar.