Ich^a Iohans Land burger ze sant Gallen tun kund vergich allermenglichem mit disem brief, als||
ich von dem erwirdigen gotzhus ze sant Gallen sehs pfunt pfenning Costentzer muns jarlichs||
zins hân nach lut vnd sag mines briefs, den ich darvmb versigelt hab, der selbe zins mir aber||
von etwe vil vergangnen jaren nit vollenklich worden vnd ain tail versessen waz, sol menglich ze wissent sin, das mir der hohwirdig furst abt Chun abt des selben gotzhus ze sant Gallen¹ vnd Cunrat Musler² sin hofamman ze sant Gallen von sinen wegen der selben versessnen zins von allen verloffnen jaren vntz vff das jar, als man zalt von Cristus geburt vierzehenhundert vnd zehen jar, vnd ôch des zins, so mir vff das selbe jar gevallen waz, vnd darzu vier pfunt pfenning fur den ochssen, der dem Truhsatzzen von Diessenhofen³ ward, tugentlich vnd gar vnd gantzlich vsgeriht vnd bezalt hât, vnd ist mir das abgeschlagen ervolget vnd worden an disen nachgeschriben stuken, dez ersten an dem koff, den ich tatt von Bisihus⁴, vierzehen pfunt vnd die vier pfunt fur den ochssen ôch an dem kôff von Bisihus, aber by dem kôff von Seki⁵ vnd by dem kôff vmb dz ain pfunt pfenning geltz von Rôschach⁶ zwelff pfunt vnd by dem kôff von Stegen⁷ ôch zwelff pfunt alles guter Costentzer pfenning. Vmb dz so lân vnd sagen ich den obgenamten minen gnadigen herren abt Chunen sin nachkomen vnd daz obgeschriben sin gotzhus vmb alle vorgedaht verfallen versessen zins vnd och vmb den vorgenamten ôchssen quitt ledig vnd los ietz vnd hernach mit vrkund dis briefs fur mich vnd alle min erben, also dz wir noch nieman von vnser wegen in noch sin nachkomen noch daz selbe gotzhus noch iro lut noch gut darvmb nit furbz sollent noch wellent ansprechen vftriben noch in kain wis beswarren weder mit gaistlichem noch weltlichem geriht noch ân reht noch mit kainen andren sachen. Vnd des ze offemm wârem vrkund so hât der ersam Lienhart Payer ôch burger ze sant Gallen disen brief fur mich vnd min erben versigelt von miner bet wegen, won ich nit insigels han, doch im vnd sinen erben ân schaden. Geben an sant Valentis tag in dem jar, do man zalt von Cristus geburt vierzehenhundert jar, darnach in dem ainloften jare.