Ich^a Johans Schmitter der pfister burger ze sant Gallen tun kunt vnd vergich offenlich mit disem brief fur mich vnd alle min erben, als die erwirdigen gaistlichen herren||
Chun von gottes gnâden abt vnd der convent gemainlich des gotzhus ze sant Gallen¹ fur sich vnd iro nachkomen mir vnd minen erben das ain pfunt pfenning||
ewigs geltz vnd jarlichs zins vnd dryg schilling vnd dryg pfenning jarlicher sunderstur, die sy gehebt hant ab vnd vsser minem hof, den man nemet Varna²,||
gelegen vor der statt ze sant Gallen vnd ainhalb stôsset an Hansen Knustysens gut, andrunthalb an Schonenwegen³ vnd vber sich vff an die strâss ze Waldi², der min lehen ist von dem vorgenanten gotzhus ze sant Gallen vnd dem egenanten minem gnadigen herren abt Chunen vnd den ich ietzo inne han, der selbe zins vallet allerjarlich vff sant Gallen tag, so vallet der stur sehzehen pfenning vff den mayen vnd dryg vnd zwainzig pfenning vff den herbst, aines staten ewigen kôffes redlich vnd reht verkôffet vnd ze kôffent geben hand vmb nunzehen pfunt pfenning der obgeschriben muns vnd sich der zins vnd stur gantzlich verzigen vnd des kôffes zins vnd stur gelôpt hant, weren ze sind, als das der kôffbrief wiset vnd seit, den ich darvmb von inen versigelt inne han, sol menglich wissen mit disem offenn brief, das ich fur mich vnd alle min erben vnd ôch fur die, in dero hand vnd gewalt der vorgeschriben min hof hienach iemer me kumpt, den vorgenamten minen gnadigen herren abt Chunen vnd dem convent des vorgedahten gotzhus ze sant Gallen vnd iren nachkomen vnd dem selben gotzhus die fruntschaft vnd gutlichi han getân vnd ôch tun vnd inen gewalt gib mit disem brief, wenn vnd welhes jares sy das vorgeschriben jarlich gelt vnd ewig zins vnd stur ab vnd vsser dem vorgedahten hof von vns widerkôffen wellent, das wir inen des widerkôffes gestattnen vnd by guten truwen gunnen sollent ze tund vnd inen ôch den sollent geben ân alle widerred ân geuerde. Wenn ôch sy den widerkôff tun wellent ald mich ald min erben ald die, so denne den selben hof inne hand nach vns, des ermanent vnd vns sament vnd mit enander gebent die vorgeschriben nunzehen pfunt pfenning der vorgeschribnen muns ald anderlay werung vnd muns souil wert da fur, die ze sant Gallen gemainlich in der statt genam vnd geng ist, ie ze den ziten vor sant Johans tag des Tôffers ze sunnwendy, so sy das tund, so sollent ich ald min erben, ob ich enwar, oder die so denn den selben hof inne hant, das gelt von inen oder iren botten enpfahen vnd inen den widerkôff geben ân alles verziehen gantzlich ân arglist, vnd sol denn da mit der vorgeschriben zins vnd jarlich ewig gelt vnd stur von dem ab vnd vsser dem vorgeschriben hof den vorgenamten minen gnadigen herren abt Chunen dem convent gemainlich vnd iren nachkomen vnd dem vorgedahten gotzhus ze sant Gallen gantzlich ledig vnd los sin von mir vnd allen minen erben vnd den, so denn den selben hof inne hand, ân alle widerred vnd dehain ansprach me darzu haben vnd inen den kôffbrief wider geben ân verziehen. Vnd wenn sy den widerkôff tund nach sant Johans tag ze sunnwendy, als vorgeschriben stât, so sol vns der zins vnd die stur, so denn vff den selben sant Johans tag ist gevallen, ervolgen vnd werden vnd nit furo, vnd sol damit der selbe zins vnd die stur den vorgenamten minen gnadigen herren abt Chunen dem convent gemainlich vnd iren nachkomen vnd dem vorgedahten gotzhus ze sant Gallen gantzlich vnd gar ledig sin vnd los, als vorgeschriben stât, vnd inen den koffbrief wider geben ân alle widerred, als ich by guten truwen fur mich vnd min erben vnd die, in dero hand der selbe hof ist vnd den inne hand, gelôpt hân. War aber, das ich ald min erben ald die, in dero hand der selbe hof stund, den kôffbrief nach dem vnd der widerkôff war beschehen, nit gabint noch antwurtint zu der vorgenamten miner gnadiger herren abt Chunen des conventes iro nachkomen vnd des vorgeschriben gotzhus handen, so solti doch dannenhin der selbe kôffbrief mir vnd allen minen erben vnd ôch den, so den selben hof inne hand, gantzlich ab tôd vnkreftig verniht vnd vnnutzz sin allenthalb, wa der furgebotten wurd vor geriht gaistlichem vnd weltlichem vnd vssrent dem geriht, vnd solti den obgenanten abt Chunen dem convent vnd iren nachkomen vnd dem obgeschriben gotzhus ze sant Gallen gantzlich vnschadlich sin. Vnd des ze offemm warem vrkund vnd vester sicherhait so han ich erbetten, won ich nit aigens insigels hân, den erbern Vlrichen Furer burger ze sant Gallen, dz er sin insigel fur mich vnd min erben vnd nachkomen an disen brief gehenket hât, des ich der selb Vlrich Furer an disem brief vergich mir vnd minen erben ân schaden. Geben ze sant Gallen des nachsten fritags nach sant Othmars tag in dem jar, do man zalt von Cristus geburt vierzehenhundert jar, darnach in dem zehenden jare.