Ich^a Hainrich von Rumblang¹ trager vnd pfleger der lehen, so Wernhers Giels² salgen kind ze lihent hant, tun kunt vnd vergich||
allermenglichem mit disem offenn brief, das fur mich kamen ze sant Gallen in der statt uff disen huttigen tag, als dirre brief||
ist geben, dis nachgenempten erbern lute Margareth Vlrichs von Hub³ burgers ze sant Gallen elichu wirtinne vnd Elzbeth,||
Vlrich, Verena vnd Vrsell ir elichen kind vnd offnotent vor mir, wie das sy von des obgenanten Wernhers Giels salgen kinden ze lehen hettint ainen zehenden ze Nidrenwile⁴ by Glatburg⁵ gelegen, den selben zehenden sy verkôffet vnd ze kôffent geben hettint den wolbeschaidnen Johansen dem Landen burger ze sant Gallen vnd Guten siner elichen tohter, vnd batent mich ernstlich an der obgenanten kind statt, das ich den selben zehenden ze Nidrenwile von inen vfnam vnd den ze lehen lih den obgenanten Johansen dem Landen vnd Guten siner elicher tohter ze gemaind vnd in rehter gemaind wise. Darvmb erhort ich iro flissig bett, won mich die reht vnd redlich duht, vnd nam den vorgeschriben zehenden ze Nidrenwil von iro handen uff an min hant vnd leh den do ze stund an der obgenanten kint statt vnd lih in wissentlich in kraft dis briefs mit aller zugehorde ze lehen den selben Johansen dem Landen vnd Guten siner elicher tohter ze rehter gemaind vnd in gemaind wise, was ich inen durch reht lihen sol vnd mag, also das sy den selben zehenden ze Niderwile mit allen rehten vnd mit aller zugehord ân mengliches sumnust vnd hindernust in lehens wis inne haben vnd niessen sont vnd mugent in allen den rehten vnd gedingen, als ob sy man warint, doch den obgenanten kinden iren erben mir vnd minen erben vnd allen vnsren nachkomen an allen vnsern rehten der lehenschaft vnd andren guten gewonhaiten gantzlich vnuergriffenlich vnd allerding vnschadlich. Vnd ze offemm wârem vrkund vnd gantzer sicherhait dirre vorgeschriben dinge vnd vergicht so han ich Hainrich von Rumblang min insigel fur mich vnd die obgenanten kint, won sy zu iren tagen nit komen sint, offenlich an disen brief gehenkt. Der geben ist ze sant Gallen an sant Agthen abent der hailigen junkfrôwen in dem jare, do man zalt von Cristus geburt vierzehenhundert jar, darnach in dem zehenden jare.