Ich^a Hans Paiger von Hanbul¹ vndervogt ze Frowenfeld² vergich vnd tun kunt||
allermenglichem mit disem brief, alz der from vest ritter her Italherman von||
Landenberg von Grifese³ min gnadiger herr vnd frow Margret sin muter geborn||
von Blumnegg⁴ min gnadigi frow, den ich baiden von dem lib zugehort, mich mit lib vnd gut fur sich vnd alle iro erben vffgeben vnd gantzlichen ledig gelassen hânt, also dz ich mich mit lib vnd gut geben mag, wem ich wil nach des briefs sag, so ich von inen besigelten inne hân, daz och ich da mich selber mit lib vnd gut vnd mit aller zugehord wissentklich geben hân vnd gib mich och ietz mit disem brief an dz erwirdig gotzhus ze sant Gallen, desselben gotzhus dienstman ôch der obgenant min herr von Landenberg ist vnd darzu gehort, also dz ich mit lib vnd gut vnd mit aller zugehord hinfur jemermer desselben gotzhus ze sant Gallen man sin vnd haissen sol alz ander desselben gotzhus lut, doch also mit gedingd, dz man mich ân minen gunst vnd vrloben von dem selben gotzhus niemer versetzen noch verkoffen noch jemant verlihen noch jemant vber mich erloben sol, alles luterlich ân alle geuerd. Mit vrkund dis briefs, der mit minem anhangenden insigel versigelter geben ist ze Winterthur⁵ nach Cristz geburt vierzehenhundert jar, darnach in dem nunden jar, an dem hailgen aubent ze pfingsten.