Ich^a graf Fridreich von Tokhemburg¹ etc. bekenn offenlich mit dem brief fur mich vnd mein erben, als ich||
ain ansprach gehebt han von geltschuld wegen, als hernach begriffen ist, hintz den hochgeboren fursten hertzog||
Leupolten vnd hertzog Fridrichen hertzogen ze Osterreich² etc. meinen gnedigen herren, des ersten vmb vier||
tawsent guldin, die von dem wolgeboren meinem lieben oheim graf Hawgen von Montfort herren ze Bregentz³ darrurent, nach seins briefs sag, den er darumb innhat, so denn von der dreyertausent guldin wegen haubtguts, darumb ich ainen brief han von den egenanten meinen herren von Osterreich, vnd darzu von des kosten vnd schaden wegen, so darauf ist gegangen, daz ich also mit dem egenanten meinem gnedigen herren hertzog Fridrichen von derselben ansprach vnd vordrung wegen gericht vnd geslicht pin in der mass, als hernach geschriben stat. Zum ersten vmb die obgenanten viertausend guldin haubtguts sol mich der obgenant mein gnediger herr hertzog Fridrich gegen den von wegen meinem oheim graf Hawgen mitsamt den zinnsen, so dauon ausstet, vnd vmb allen redlichen schaden vnd kosten, so von laistung oder andrer redlicher vnd kuntlicher sach wegen darauf ist gangen, entledigen vnd abtragen in solcher mass, daz derselb graf Hawg ain benugen daran gewinn vnd die burgen von scheden ledigen an geuerd. Item denn von der scheden wegen, so ich genomen hab von der obgenanten dreyertausent guldin wegen, darumb ich von den obgenanten meinen herren von Osterreich ainen brief han, sol er mir tawsent guldin slahen auf den satz zu Sangangs⁴ vnd mir darumb seinen brief geben. Darnach so sol mir der egenant mein herr hertzog Fridreich die obgenanten drewtawsent guldin, darumb ich seinen vnd meins herren hertzog Leupolts brief han, vnd tausent guldin scheden, die auch darauf gangen sint, ausrichten vnd mir darumb gnug tun zwischen hinnen vnd der alten vasnacht nechstkunftigen vnd mir die antwurten gen Costentz oder gen Zurch in der stett aine, wa ich hin wil, an geuerde. Vnd wann er mir also darumb gnug tut, so sol er sein bruder vnd erben vmb all zuspruch vnd scheden, die von der sach wegen aufgelowffen sint, gentzlich ledig sein, vnd sol ich den gegenbrief, den er mir von der tayding wegen geben hat, vnd all ander geltschuldbrief, die ich von im oder seinem egenanten bruder hertzog Leupolten von der zwayer stukh wegen han, herauzz geben an all geuerd. Denn vmb ander mein scheden, die auch von der vorgenanten sach vnd ansprach wegen aufgelauffen sint vber die summ, so vorbenennt ist, das sol gentzlich zu meins egenanten herren hertzog Fridr(icheⁿ gnaden besten. Ich welhen der egenanten stukhen aber mir nicht gnug gescheeh, was ich oder mein erben des nach dem obgeschriben zil ze schaden komen, den sol er mir mitsampt dem haubtgut ausrichten vnd bezalen, vnd hat mir erlaubt, darumb sein land vnd leeut anzegreiffen nach des briefs sag, den ich von paiden obgenanten meinen herren darumb han, doch ist ausgenomen der brief, der da lawtet tawsend vnd sybenzig guldin, der ist in diser tayding nicht begriffen, daran sullen mir meine recht behalten sein, ob sich ervindet, daz^b icht rechtens daran han. Vnd ze vrkund der tayding gib ich den brief versigelt mit meinem aigen anhangunden insigel. Der geben ist an suntag nach vnserr frawen tag concepcionis nach Christs gepurd in dem viertzehenhundertisten vnd dem achten jar.