Ich Rudolff von Rosenberg¹ gesessen ze der alten Ramschwag² tun kunt vnd vergich offenlich fur mich vnd fur alle min erben mit disem brieff allen, die in ansehend oder horend lesen, das ich mit wolbedachtem mut vnd guter vorbetrachtung durch miner vnd miner vordren selen nutz vnd heiles willen Heinrichen vnd Annen die jungern Oswalt Fryen seligen von Hefenhofen³ elichen kind, die min lehen warent von dem erwirdigen gotzhus ze sant Gallen, gar vnd gantzlich mit lib vnd gut mit allen rechten vnd ansprachen, die ich ze iro lib oder gut hatt ald haben mocht, an das vorgeschriben gotzhus ze sant Gallen willenklich frilich vnd ledklich geben han vnd gib si bedi mit lib vnd mit gute an das vorgeschriben gotzhus ze sant Gallen mit disem brieff. Ich han ouch die selben vorgenanten Heinrichen Fryen vnd Annen sin swester die jungen gar vnd gantzlich mit lib vnd mit gut mit allen rechten vnd ansprachen, die ich zu inen hatt ald haben mocht sol vnd mag han nu vnd ouch hienach, zu des erwirdigen fursten mines gnedigen herren von gotz gnaden abt Chunen des vorgeschribnen gotzhus ze sant Gallen⁴ vnd zu desselben gotzhus handen also vnd in den rechten, das die vorgeschriben Heinrich vnd Anna die junger geschwistergit gar vnd gantzlich nu hinnenhin jemer me mit lib vnd mit gut mit allen rechten vnd och ansprachen, die ich zu inen hatt ald haben mocht, an das vorgeschriben gotzhus ze sant Gallen gehorren sond, vnd darvmb so han ich mich willenklich verzigen vnd verzich mich mit disem brieff gar vnd gantzlich fur mich vnd min erben der vorgenempten Heinrichs vnd Annen geschwistergit gemeinlich vnd sunderlich gar vnd gantzlich mit lib vnd mit gut vnd mit allen rechten aller eigenschafft aller lehenschafft aller besatzung aller zugniss aller vszug aller kuntschafft aller gewerr lut vnd brieff alles geistlichen vnd weltlichen gerichtes aller vordrung vnd ansprach aller recht vnd rechtung, so ich oder min erben, ob ich enbin, an den zu den vnd von der vorgenanten Heinrichs vnd Annen geschwistergit liben oder gut von eigenschafft ald von lehens wegen je gehebt haben ald jemer me hernach gehaben oder gewinnen mochtind. Vnd des alles ze offem warem vrkund vnd stater sicherheit aller vorgeschriben ding vnd vergicht so han ich Rudolff von Rosenberg da vorgenant fur mich vnd alle min erben min insigel offenlich gehenkt an disen brieff. Der geben ist ze Ramschwag vff miner vesti an sant Bartholomeus abent des heilgen zwolffbotten in dem jare, do man zalt von gotz geburt vierzehenhundert jar vnd darnach in dem achtenden jare.