Wir^b Leupolt vnd Fridreich gebruder von gotes genaden herczogen zu Ostenreich¹ ze Steyr zu Kernden vnd ze Krain grauen zu Tyrol etc. bechennen,||
daz wir den erbern weisen vnsern besunderlieben .. dem burgermeister dem rat vnd den purgern gemeinclichen zu Costencz schuldig sein vnd gelten sullen||
vier tausent guter Reynischer guldein von wegen vnsers kriegs gen den Appenczellern², darinne si vns getrewlich beygestendig vnd geholffen gewesen||
sein vnd noch hinfur sullen, als wir in des vnczweiuellich wol getrawen. Vnd dieselben vier tausent guldein haben wir in gelobt vnd verhaissen geloben vnd verhaissen auch wissentlich zu geben vnd auszerichten zu den nachsten kunftigen pfingsten vnuerczogenlichen vnd an allen iren schaden angeuerde. Vnd des zu vrchund geben wir in disen vnsern brief versigelten mit vnsern anhangenden insigeln. Geben zu Costencz an mentag nach dem suntag, als man singet Oculi, in der vasten nach Cristi gepûrde vierczehenhundert jar vnd darnach in dem sechsten jare.