Ich^a Haintz Moser sesshafft am Zschutsch¹ ze Kalcheran² vnd ich Elsbeth von Sattelberg³ sin elichu husfrôw veriehent vnd tund||
kund allermenglichem mit disem offenn brief, das wir baidusament ainberlich gemainlich vnd vnuerschaidenlich mit guter||
williger vorbetrachtung ze den ziten vnd tagen, do wir es mit dem rechten fur vns vnd all vnser erben wol kreffteLklich getun mochtent, sunderlich mit Vlen Lassers des landammans hand ze Rankwil⁴ recht redlich vnd aigenlich verkôfft vnd ze kôffent geben habint ains bestaten vngeuârlichen ewigen kôffs vnd fur recht ledig vnuerkumbert aigen gut Vlrichen Gumel ainem schuchmacher burger ze Veltkilch⁵ sinen erben vnd nâchkomen disu hienachgeschribnu vnsru aignu stukk gut vnd guter, du am Zschuttsch ze Kalcharan gelegen vnd von allermenglichem gantzlich ledig lôs vnd vnuerkumbert sind, des ersten vnser aigen gut hus hofstatt bongart vnd wingart, das alles in ainer zunung gelegen ist, stossent ainhalb an des Gamptz guter andrenthalb an Hanslis Schnides wingarten obnan an die gemaind vnd vnnen an die strâss, item vnsern halbtail des torggels, da der ander halbtail och dem Gamptz zugehoret, an dem geschierr vnd gezimber, vnd darzu vnsern aigenn bongarten gelegen im Bohler⁶, stosset ainhalb an des ietzgenanten Hanslis Schniders bongarten vnnen an des Gyren mur vnd suss allenthalben an die strâss, mit grund mit grât mit gezimer mit gemur mit gengen stegen vnd wegen mit wasen mit zwy mit wunn mit waid vnd schlechteklich mit allen rechten nutzzen fruchten guten gewonhaiten ehafftinen vnd zu gehorden benempten vnd vnbenempten, vnd ist das ewig vnser redlich verkoffen vnd hingeben der ietzgenanten vnser aignen stukk gut vnd guter alsuss geschehen vmb hundert pfund vnd funf vnd vierzig pfund alles guter genamer pfenning Costentzer munss, dero wir allersament nutzlich vnd ôch gar vnd gantzlich nâch vnserm willen an barem gelt von inen gewert vnd bezalt sygint, mit dem geding das wir vnd all vnser erben des ewigen redlichen kôffs vnd nammlich aller hievorgeschribner ding vmb die vorgedâchten vnsru aignu stukk gut vnd guter mit aller ir zugehorung vnd rechtung, als vor ist beschaiden, sin vnd och siner erben gut vnd getruw wern vnd gewern sin sollint nâch recht, wâ vnd gegen wem su des an gaistlichem vnd an weltlichem gericht jemer bedurffent ald notdurfftig werdent, by vnsren guten truwen ân all irrung widerred vnd geuard. Vnd des alles ze warem offem vrkunde vnd stater fester sicherhait nv vnd hienâch so hand wir im vnd allen sinen erben vnd nachkomen disen brief hiervber ernstlich gebetten besigeln mit des vorgenanten landammans Vlen Lassers anhangendem insigel, darvnder wir vns vnd all vnser erben willeklich vnd festklich verbunden habint vnd bindent aller hievorgeschribner ding mit krafft vnd vrkund dis offenn briefs, das selb min insigel ich ietzgenanter landamman Vl Lasser durch des obgenanten Haintzen Mosers vnd Elsbethen siner elicher husfrôwen ernstlicher vergicht vnd bett willen ze ainer wâren gezugnuss vnd festen bestatnuss des obgeschribnen iro ewigen verkoffens, won si das alsuss mit miner hand vnd mit allen andren sachen entzihen vnd vffgeben getân vnd vollfurt hând, das es ze recht wol krafft vnd macht haben vnd fest vnd stat belyben sol nv vnd hienâch in der wyse vnd mainung, als davor geschriben vnd beschaiden ist, ân all geuard, doch mir selb vnd minen erben vnschadlich gehenkt hab an disen brief. Der ze Veltkilch geben ward des jâres, do man zalt von Crists geburt vierzehenhundert vnd darnâch in dem sechszten jâr, ze ingandem mertzen.