Allen den, die disen gegenwertigen brief sehent alder horent lesen, kunden wir V^olrich Hinder sant Johans, Claus der Drehsel pfleger || der armen lute an dem velde, Cv^onrat von Zelle¹ der selben armen lute maister, das her Wernher, den man da sprichet der Hunt von sant || Gallen, het gecovfet durch siner sel hails willen vnde durch siner wirtin sel hailes willen vns vnde dem spital hie zv^o Costenze gemainlich || zv^o niesende ain hus, das ist gelegen in Nidernburg an dem orte in Bruggassun gen dem brunnen, vmbe fiunf vnde fierzig marge Silbers, das giltit ierliches ses pfunt Costenzer. Dar zv^o so het er vns vnde dem^a) selben spital gemainlich gegen zwainzig pfunt Costenzer, das wir des geltes deste sicher sien, also geziuhet sich iewederm huse ierliches driu pfunt. So sol der maister der armen lute siniu driu pfunt sinen durftigun also an legen, das er in alle wohen in der vasten dri Schillinge sol gen vmbe Diessenhofer brot. Er sol ovch zv^o des vorgenanten Wernhers iargezit in gen zechen Schillinge vnde zv^o siner wirtin iargezit Belinnun ovch zehen Schillinge, das si da von haben zwene dienste. Der selbe maister sol ovch sinen durftigun gen zvelf Schillinge zwissan ostervn vnde pfinxten vmbe aier, also das man iegelichem durftigen zv^o dem tage, die wile si werunt, zwai aier gebe^b). Er sol ovch gen den selben durftigun an vnser frowen tag zv^o dem erende fiunf Schillinge vnde an sant Johans tag zv^o sungihten ovch fiunf Schillinge, das si da mit covfen^c), swas in wol gevallet, also so het er in berichtet diu vorgenanten driu pfunt geltes. Were aber, das das hus der ses pfund Pfenninge ierliches nit fergelten mochti, so sol den durftigun zv^o iegelicher gesezete gelichelichen abe gan nach dem, als des geltes abe gat. Beschehe aber das, das diu maisterschaf der selben armen^d) lute den durftigun dirre gesezete denhainer abe genge, so sol der maister der armen lute den nuz, der zv^o der selbun gesezete vellet, gebunden sin zv^o gende den siechun in dem spital. Dirre dinge sint geziuge her Johans der liupriester zv^o dem spital, her Eberhart sin geselle, her Arnolt der Milwe von Lindowe², V^olrich der Milwe sin brůider vnde vil ander erberen lute. Das aber dis ganz vnde stete belibe, dar vmbe so geben wir der vorgenanten armer lute an dem velde insigel vnde des spitals insigel zv^o hengede an disen brief zv ainem steten vrkunde. Dirre brief wart gegeben^e), do man zalte von gůttes^f) geburte tusent iar, driu hundert iar, in dem seszehendem iar, an sant Peters vnd an sant Pauls tag.

Source Fulltext: Chartularium Sangallense V, Nr. 2975, S. 308-309.