Allen den, die disen brief ansehent oder ho^erent lesen, tůn kunt wir Eglolf vnd V^olrich von Iberg¹ gebrůder, daz wir durch vnser not willen hein ze ko^vffenne || geben recht vnd redelich vnd an alle geuêrde den erberren vrowen der meistrin vnd dem samnung ze Gnadental² ob Melligen³ vnsern bo^vngarten vur || lidig eigen, der gelegen ist zewuschen der Rusen⁴ vnd Isenhartz brunnen⁵, giltet acht stukke, vnser matton, du gelegen ist^a) ob dem selben brunnen, giltet ein halben || mutte kernen, die Arnold von Totinkon⁶ hat vmb dem^b) selben zins, vur erbe von dem gotzhuz von sant Gallen, vnsern bo^vngarten, der gelegen ist nide dem vorgenanden brunnen, giltet nun vierteil kernen, o^vch vur rechtes erbe von sant Gallen, dar si ierlich geben sullen da von vier pfenning zinse, vnd vnsern garten, der gelegen ist vf der Ruse bi Johans garten Anshelms, gilt ein vierteil kernen, vur zins eigen von vnsern herren den herzogen⁷, vnd in allem dem rechte, so wir vnd^c) vnser vordem si gehebet hein vntz an disen hutigen tag, vmbe funf vnd sibenzig pfunt pfenning Zouinger⁸, der wir von in gentzlich gewert sin, vnd sint da mit vnser swestern Agnês vnd Adelheit ze kloster geuertigot vnd beraten, vnd enzihen vns willeklich vnd offenlich an disem brieue alles dez rechtes, so wir hatton oder wandon han an den vorgenanden bo^vngarten, matton||
oder garton, vnd geloben bi vnsern truwen, niemer kein ansprache daran ze gewinnen mit geislichem oder weltlichem gerichte oder deheinen andern weg, der dien vorgenanden vrowen schedelich mo^echte sin, vnd ir rechten wern ze sinne nach rechte allez, so da vor geschoben ist, wa vnd wenne si sin bedurfen. Ich der vorgenande V^orich vergich o^vch, daz ich du vorgenanden gu^eter han geuertigot dem vorgeschriben samnung mit Willinon vnd Margareton minen dochtren, die sich willeklich mit miner hant hein enzigen allez dez rechtez, so si daran hatton. Wir veriehen o^vch beide, daz diz allez beschehen ist mit al der gewarsami vnd Sicherheit, so ze solichem ko^vffenne vnd verko^vffenne^d) enzihenne vnd vertigonne ho^eret oder man tůn sol, vnd svnderlich den vorgenanden bo^vngarten vnd matten, die da erbe sint von sant Gallen, hein wir geuertigot mit Chůnr. hant Abandmans burger ze Mellingen, der gewalt het, erbe^e) von dem selben gotzhuz^f) ze lihenne. Wer aber den meren bo^vngarten het, der sol ierlich da von geben an daz gotzhuz ze Mellingen ein mut kernen dur vnsers vatter vnd můter sele wille^g), die in dar uf zů einem selgerête gesezzet hein. Wir hein o^vch vns selben vs behebet die eigenschaft dez wegez, so zu den vorgenanden gu^etern gat, also daz si in sullen^h) niessen, wenne si sin bedurfen, dar an sullen wir si oder der si anho^eret niemer geirren noch besweren. Daz aber diz allez war si vnd stiete belibe, darumbe so het vnser ietweder sin ingesigel gehenket an disen brief, vnd bitten die erberen vnd bescheiden lute den .. schultheissen vnd den rat ze Mellingen, daz si ir stat ingesigel henken an disen brief. Wir der .. schultheisse vnd der rat der vorgenanden stat ze Mellingen durch bette der vorgeschriben Eglolfes vnd V^ol. henken vnser stat ingesigel an disen brief ze einem offennen vrkunde derⁱ⁾ vorgeschriben dinge. Diz beschach ze Mellingen, do man von gottes geburte zalte drizehenhundert iar, dar nach in dem sechzehenden iare, an dem nechsten zinstage vor sant Margareten tage, da ze gegene waren her Nicolaus kilchherre ze Birbomsdorf⁹, Walther||
von Iberg, Hartman von Vilmeringen¹⁰ schultheisse, Johans Bitterkrut, Joh. Kupfersmit, V^olrich Meiger von Rordorf¹¹, Chůnrat Abandman^k) burger ze Mellingen vnd ander erber lute genůge.

Source Fulltext: Chartularium Sangallense V, Nr. 2976, S. 309-310.