Ich Jans der Greif und ich Ann sein hausvrowe und unser erben wir vergehen offenlichen mit dem brief daz wir von des gepotes wegen so der edel und hochgeparn furst hertzog Ruedolf selig in Osterreich in der Stat ze Wienn umb Gruntrechts und Purchrechtes ablosung gepoten und auf gesatzt hat, Recht und redleichen abzelosen geben haben, vier wienner phenning geltes grunt-rechtes die wir gehabt haben auf Otten haus von hof gelegen an dem Ekke gegen dem Chuerssen-haws uber ze nast Jorgen haws von Nicolspurch umb zwen und dreizzig wienner phenning der wir gar und gantz gewert sein, Dem obgenanten erbern mann Otten von Hof, dem Chursner ze Wienne und sein erben also beschaidenlichen das wir noch all unser erben noch ander niemant von unsern begen hintz in noch hintz allen irn erben umb die obgenanten vier wienner phenning nimmer dhain ansprach chrieg noch vodrung nicht haben noch gebinnen sullen weder vil noch wenich wêr aber ob furbas icht prief oder urchund fuer pracht wurden die sagten umb die obgenanten vier wienner phenning gelts Gruntrechtes und das das obgenant ir haws damit anspruchig wurd von swem das wêr dieselben brief und urchund sullen denn aller sach tot und ze nichte sein und dhain chraft nicht enhaben weder chlain noch grozz und des ze urchund so geben wir in den brief versigilten mit meinem Insigel und mit des erbern manns Insigel Meinharts des Pimier purger ze Wienn der der sach zewg ist mit seinem Insigel. Der brief ist geben ze Wienn nach Christi gepurd drewtzehen hundert jar dar nach in dem ains und sibentzigistem jar des nasten Mantags nach sand Urbans tag.

Source Fulltext: Peter Peusquens