Ich Paltram des Vocen sun, und ich Hainreich, sein prueder, wir veriehen, und tun chunt, allen den die disen prief lesent oder horent lesen, die nu lebent, und her nach chunftich sint, daz wir mit gutem willen, und mit verdahtem muet, zu der zeit, do wir ez wol getuen mohten, und mit unsers Gruntherren hant, Prueder Nychlaus, zu den zeiten Comentur des Gothouses sande Johannes, in der Chaernaer Strazze ze Wienne, verchouft haben, unsern Garten, der da leit in der nidern Owe, den selben Garten haben wir reht und redelichen ver-chouft und gegeben, mit allem dem nutze und reht, als wir in, und unser vordern her praht haben, in Purchrehtes gewer, umb vier und viertzich March Silbers, wienner gewihtes, der wir reht und redelichen gewert sein, dem beschaiden Manne Willehalmen in dem Stroehof, und siner housfrowen, vron Katherien, und allen iren Erben, furbaz allen iren frumen da mit zu schaffen, verchouffen, versetzen, und geben swem si wellen, als ez in aller peste chome und fuege, an allen irresal, und zu einer pezzern sicherheit so setzen wir uns unverschei-denlichen, uber den vorgenanten Garten, ich egenanter Paltram, und ich, Hainreich, sein Prueder, Willehalmen in dem Stroehof, und seiner housfrowen, vron Katherien, und allen iren Erben, zu rehten gewern, und scherme, fur alle ansprach, als Purchrehtes reht ist, und der Stat reht zu Wienne, und dar uber so geben wir in disen prief, zu einem sihtigen urchunde, und zu einem waren getzeuge, und zu einer ewigen vestenunge diser sache, versigelten mit unser paider Insigeln, und mit des vorgenanten unsers Gruntherren Insigel, Prueder Nyclaus, des Comentur, und mit unsers Oeheimes Insigel, hern Wolfbers von Haekingen, und mit unsers Geswein (Schwager) Insigel, Otten Votzen, und sint auch des getzeuge, her Herman von sande Poelten, zu den zeiten Muinzmaister zu Wienne, her Andre, und her Leupolt, sein Prueder, her Herbort auf der Seul, her Geori, hern Andres sun, an dem Chienmarcht, her Lamber sein Pruder, her Herman, der Snaetzel, Herman, der Ruedolvin Enichel (Enkel) von sande Poelten, und ander frume Leut genuech, den diseu sache wol chunde ist. Diser prief ist geben zu Wienne, nach Christes geburte, dreutzehen hundert jar, dar nach in dem zwaintzgisten jar, an sande Georin tage.

Source Fulltext: Peter Peusquens