Wir Herman von sand Polten ze den zeiten Burger Meister und der Rat van der Stat ze Wienne veriehen und tuon chunt allen den die disen brief sehent oder hoerent lesen die nu lebent und hernach chunftich sint. Daz fur uns chom in den Rat die Erwaer vrowe vro Engel. Otten wytibe dez Pyterleins und Heinriches Tohter dez Chra den peiden Got genad. und bewaert vor uns als sie ze reht solde mit zwen Erwaern Mannen. hern Ulrich von Wienne Heinrich dem Stroubingaer. Daz sie vor rehter Ehafter Not maninger hande Gulte da sie bei ir wirtes lemptigen (lebendigen) zeiten ze Christen und ze Juden in gevallen was ir anerstorben Gutiz purchrehtes van ierem vater dem Egenanten niht lenger versparn mecht. Und dez selben purchrehtes zewey phunt Geltes die da ligent an dem alten fleischmarcht ze Wienne auf dez Chundigen hous gegen sand Laurentzen uber verchouft hat umb zehen march und umb einer vierdung loetiges Silbers wienner Gewihtes dez sie redelich und reht gewaert ist. Dem Erwaern Manne hern Georien hern Andres Suon an dem Chienmarcht und seiner housvrowen vron Jeuten und irn erben furbaz vreilichen und laedichlichen ze haben und allen irn fruomen da mit ze schaffen verchouffen versetzzen und geben swem sie wellen an allen irresal und an alle ansprache. Und wand diser chouf reht und redelich vor uns in dem Rat gewandelt ist. da van so geben wir dem vorgenanten hern Georien seiner housvrowen vron Jeuten und iren Erben disen brief ze ainem sihtigen urchunde und ze ainem waren Gezeuge und ze aeiner Ewigen vestnuonge diser sache versigelten mit unser Stat insigel. Dieser Brief ist gegeben ze Wienne. do van Christes Gebuortt ergangen waren. driutzehen hundert jar dar nach in dem ahzehenten jar. dez naegsten Eritages vor unser vrowen Tag der Lihtmesse. (Dienstag, 31. Jan. 1318)

Source Fulltext: Peter Peusquens