Ersamen und weisen herren unsere gunstige liebe frunde. Unsern willigen dinste bevor. Ewer Eren prieff und begier uns zugeschriben, darynnen Ir begerund seit werlicher fusknecht euch zu zuschiken zu ewrer ytzundiger notdurft, haben wir wol vernomen, darumb sich yetz zu euch fuegen Hanns Hunderttod und Gros Matieg mit Irer geselschaft, euch zu dienen und bey zusteen, die sich als hewt derheben, uber das so haben wir auch mit ettlichen zu schaffen, das wir auch volks bey uns bedurffen was wir dennoch moechten und kunden ewrer Erberkeit zugefallen thuen, darynnen sein wir allzeit willig und bereit und piten euch begierlichen Ir wellet euch die gueten gesellen befolhen lassen sein, als wir uns des und alles gueten zu ewern Eren gantzlichen ver-sehen. Datum Sabbato post Katherine virginis Anno etc. xlvjto. Burgermaister und der Rate der Stat Bruenn

Source Fulltext: Peter Peusquens