Unsern willigen dinst zuvor Erbern und weizen lieben herren und sundere guennere und guten freunde. Als dann ewer Erberkait uns geschriben hat, und begerend seit, das wir euch hundert guter werhaftiger ffusknechte senden welden das Ir In ewern sold geben weldet, nach innhaltung ewers briefs, den Ir uns zugeschriben habt etc. Also senden wir euch ffumftzik werhaftiger ge-sellen und fusknechte, mit ewerm poten, der uns ewern brieff pracht hot, und bitten euch, Ir wellet Sy euch lassen empholhen sein, und wellet In guten willen beweizen, wenne wir hetten euch der wol mer gesendet, ader enker brieff ist uns am allerletzsten wuerden, so das wir der auff ditzmal nit mer gehaben muchten, wannn sunder wuerden, dieselben zoldner die wir euch senden underwegen ymants mit In nemen, als Sie dann maynen zutun, wellet die selben auch auffnemen, muegen wir Ir denne mee hinfuer gehaben, die wellen wir euch auch zuschicken, und lassen euch wissen, das die selben fusknechte, die wir euch senden, von uns auß unser Stat Olomuz ausgegangen sein, am ffreitage an Sant Kathran tag der heiligen jungkfrauen, als denn Ir Solt an dem selben tag angeet, noch lawth enkers briefs, darnach wist euch zurichten, und getrawen euch Ir werdet, disen fusknechten, alsovil tun, umb yren Sold, als Ir denne andern ewern Soeldnern tut, und so Ir der nymmer beduerfend seit, wellet Sy umb unsen willen, fruentlichen und guetlichen, wider von euch schicken. Und was wir ewirn Eberkaiten in disen und in andern sachen gedinen kuenden, das teten wir zuallerzeit williclich gern, und wellet ouch ewern poten nicht vormerken, das her also lang gesawmt hot, wenne es an sein schult ist, sunder wir In haben vorzogen. Geben an Sant Katherinen tag der heiligen junkfrauen und mertrerynn Burgermaister und der Rat der Stat Olemutz

Source Fulltext: Peter Peusquens