Fridrich von gotes gnaden Roemischer Kuenig zu allentzeiten Merer des Reichs, Hertzog ze Oesterreich ze Steir etc. Erbern weisen und lieben getrewen. Als Uns und den Unsern in unser Fuerstentum von ettleichen aus Behem, Mêrhern und Ungern meniger swêr angriff beschehen sind und nu yetz Jorg Zmyl und Hinko von Vettaw, und..der von der Leyppen mit raub prannt und in ander weg gross beschedigung und schêden tuon, wider Ir verschreiben, damit Si sich gen Uns und dem Lannd verschriben haben, darumb wir meniger têg und gelimphen besuochen, der Lantschaft zu Mêrhern schreiben, und meniger rechtpot haben tuen lassen, das bisher nicht hat gehelffen muegen, darumb wir in willen sein, mit ewrer und andrer unsrer Landleut, die wir auch hergevordert haben hilff und rate zugedenkhen, wie solichen muotwillen und unpilleichen hanndlungen widerstand getan, und Lannd und leut in frid und gemach gesetzt muegen werden Davon emphelhen wir ew mit ernst, daz Ir sechs aus ew, auf sand Dorotheen tag, schieristkuenftigen, bey andern unsern Landleuten hie zu Wienn habet und ew des nichts sawmen noch irren lasset. Damit tuet Ir uns ein guet gevallen. Das wir gen Ew gnêdicleich erkennen wellen. Geben zu Wienn, an dem heiligen Weichnachtabend, anno etc. quadragesimo quinto. Unsers Reichs im sechsten jar.

Source Fulltext: Peter Peusquens