Wir Fridreich von gots gnaden Roemischer kunig, zuallenzeiten Merer des Reichs, Hertzog ze Oesterreich ze Steir, ze Kernden, und ze Krain, Grave ze Tirol etc. Embieten den erbern weisen unsern lieben getrewn..dem Burgergmeister Richter und Rate ze Wienn, unser gnad und alles gut. Alz ew wissenntlich ist, daz wir yetz zeveld wider die veindt, die unsrew lannd Osterreich und Steir manigveltigkleich beschedigt haben ze ziehen maynen Begern wir an ew mit vleis emphelhen ew auch ernstleich, daz Ir bestellet und offennlich beruffen lazzet, daz man Speis und allerlay notdurft in das veld fuer, so wellen wir darob sein und ernstlich schaffen und bestellen, damit solh Speis und notdurft versichert dahin bracht und yedemann betzalt werde Daran tut Ir uns ain gut gevallen und unser ernstliche maynung. Geben zu der Newnstat an Eritag nach sannd Ulreichs tag Anno domini etc. Quadragesimoquinto Unsers Reichs im Sechsten Jare. Commissio domini Regis in consilio.

Source Fulltext: Peter Peusquens