Wir Fridreich von gots gnaden Roemischer kuenig zuallenzeiten merêr des Reichs, Hertzog zu Oesterreich zu Steir zu Kernden und zu Krain Grave zu Tyrol etc. Embieten den Erbern weisen unsern lieben getrewn..dem Burgermaister Richter und Rate zu Wienn, unser gnad und alles guet. Als ew wissenntlich ist, daz die veindt unsere lannd Oesterreich und Steir, mit nam Raub Huldung prannt toettung der leutt, und in ander weg merkchlich und menigvelticlich beschedigt habent, dadurch unser Lanntschafft in Oesterreich, yetzund bei dem tag daselbs zu Wienn, dartzu wir Si gevordert haben, ainer ordnung ist ueberain worden, damit zu den sachen getan werde, und uns all Inwaner Edl und unedel in dem viertail underhalb des wiennerwalds in unser veld, das wir wider unser veindt, mainen zuhaben, geordent hat. Davon emphelhen wir ew. Begern und pitten ernstlich daz Ir ettlich aus ew, alsmaist Ir muegt, dartzue schikchet und ordnet, mit harnasch wer wêgen phêrdten, und andern notduerfften getzeugt, so Si pest und sterkchist muegen, damit die auf den nagstkuenfftigen Eritag hie bei uns sein, und auff den nagsten Mittichen darnach von hinnen mit uns in das veld wider die veindt tziehen, und ew des nichts sawmen noch Irren lasset, wann wir uns des gênntzlich zu ew verlassen. Daran tuet Ir uns unserm lieben vettern kuenig Lasslawen, lannd und leutten solichen lieben dienst, den wir gnêdiclich gen ew erkennen wellen. Geben zu der Newnstat an Freitag vor sannd Uolreichs tag. Anno etc. XLVto . Unsers Reichs im Sechsten Jare. Commissio domini Regis in consilio.

Source Fulltext: Peter Peusquens