Ich Swester Margreth die KartuserInn dietzeit Priorynn, und wir der Convent gemain des frawn klosters, datz sand Mariamagdalen vor Schottentor zu Wienn Bekennen fuer uns und all unser Nachkoemen und tuen kund offenlich mit dem brief. Als Caspar Slinger, dem got genad, ain ewige mess in das vorgenant unser kloster zustifften geschafft und der erber herr, her Hanns der Slinger Capplan der vorgenanten mess, mit willen und nach Rat, des erbern weisen, Jacoben des Rêch-wein burger zu Wienn, des egenanten Casparn des Slinger seligen geschêfftman uns ausgericht und gegeben hat, Achttundvirtzig phunt wienner phening, die wir uns und dem egenanten unserm kloster zu nuetz angelegt haben. Davon so geloben und verpinden wir uns, und unser Nachkoemen gegen dem vorgenanten hern Hannsen Slinger und allen seinen Nachkoemen kapplên der vorge-nanten mess mit unsern trewn wissentlich in kraft des briefs, Also zu welher zeit ain Capplan oder sein verweser, die vorgenant mese in unserm kloster sprechen und volbringen wil, das wir Im aus unserm sagrêr ain Messpuech messgewant und kelich, auch den opherwein und wasser und was zu dem Altar und gotzdinst gehoert, und unsern diener, der Im zu derselben mess zu alter dient, ewklichen darzu leihen und Raichen sullen und wellen, damit derselb gotzdinst ordenlich vol-bracht werde, got zu lob und zu eren, und durch des obgenanten Casparen des Slinger sele hails willen. Wêr aber, das wir des also nicht têten und darInn sawmig erfunden wuerden, So sullen und wellen wir dann ainem Capplan zu hannden der egenanten mess die vorgenanten Achtundvirtzig phunt phening herwider aus suldig und phlichtig sein zugeben wan wir darumb mit dem brief gemont werden, darnach ynner den nagsten zwain moneyden an widerred und auszug ungever-lich. Und des zu urchund geben wir In den brief versigelten mit unser obgenanten..der Priorinn, und des Convents zu sand Maria Magdalen baider Anhangunden Insiglen. Geben an Sambstag, vor sand Veits tag Nach kristi gepurt virtzehenhundert und im Newnunddreissigistem jare.

Source Fulltext: Peter Peusquens