Ich Ulreich Sanndorffer, Richter zu Laa, Bekenn fur mich, und mein hausfrawn Anna, der Gwalt Ich hab und unser baider erben, und tun kund offennlich allen leuten in chrafft des briefs, von der zuspruch wegen, So Stephan Stetzer und sein miterben von wegen Mertten dez ledrer guet, und Hannsen seins Suns weylennt Burger ze Laa zu uns habent gehabt, umb solh zuspruch, Ist Im gesprochen worden drew virtayl weingarten gelegen zu Poyssdorff inn dem Retêch, und zway virtayl weingartten daselbs an dem Stainperg gelegen mit aller irer zugehoerung. In solher maynung daz der Stetzer furbazer mag sein frumen damit schaffen lediclich, So Im am besten fugund ist angeverd.Da hinentgegen ist uns auch gesprochen Grunt Gueter und varundhab auch nach Innhaltung dez briefs, von dem benanten Stetzer und sein erben uns darumb gegeben. Mitt urchund dez briefs, und wann Ich ditzeit mein gegraben Insigil bey mir nicht gehabt hab, So gib Ich Im den offenn brief bestett mit dez edeln Kolmans dez Grasser, phleger zu Egenburk, und Kunrats des Huendler, Statschreyber daselbs anhanngunden Insigilln, darumb Ich Sy mi vleiss gepeten hab In und Iren erben an schaden, under dy Insigel wir uns verpinden alles das stett zehalten so vor geschriben ist. Geben zu Egenburgk Nach krists gepurd virtzehenhundert jar und darnach in dem Newnunddreyssigistem jare an freytag sanndt Philipps und sannt Jacobs tag der heyligen zwelfpoten.

Source Fulltext: Peter Peusquens