Ich Dietreich der Chrannest und ich Elsepeth sein housvrowe wir veriehen und tun chunt allen den die disen prief lesent oder horent lesen. die nu lebent und her nach chunftich sint. daz wir mit unserr erben guten willen und gunst mit verdachten mute und mit gesampter hant nach unser pesten vreunde Rat zu der zeit do wir ez wol getun mochten. recht und redelichen verchouft haben unserr rechten gulte. funftzehenthalb phunt wienner phenning geltes. der zwai phunt und zwaintzzich phenninge ligent pei dem haydehoffe da von man dient alle jar hern Hainrichen dem Chezzeler under den Mittern Chramen. funfthalben schilling. an dem Goldekche enhalben dem Laher wege. dreu phunt und Neun phenninge da von man dient den Schotten funf und viertzich wienner phenninge der Jacobinne sun von chruet ain halb phunt. da selbens an dem Goldekche. zehen und funf schillinge da von man dient den Schotten zehen phenninge und auf der Lampfleischinne prunne an zehen Neun schillinge da von man dient den Schotten zwaintzzich phenning. und in den werluzzen. auf dem Mittern wege. Neun schillinge da von man dient den Schotten vier phenning von ainem weingarten datz Etzigestorf. zwelf schilling. dreistunt in dem jar. her Wilhalm pei dem prunne von seinem Stadel. garten und hous. zehen schillinge zwir in dem jar. von Seydleins house des Eysengretels. vor stuben Tor sechtzich wienner phenning. dreistunt in dem jar von Marcharts house des pinter funf schilling dreistunt in dem jar von Albrechts des laynholtzs weingarten. und Ulreich seins gesellen in Albrechts gereuth. ayn phunt. von Hainrichs house des weinchoster vor Stuben tor sechzig phenning dreistunt in dem jar Marchart der Laurein. Chunrat der List von ainem weingarten haizzet die Sibenstokche. zwelf schillinge an sand Colmans Tage. von Wysents house des Ventzels. ze Grintzingen ain halb phunt. an sand Cholmanns Tage. von Ulreichs house des Rotsmides vor Stuben Tor sechs schillinge dreistunt in dem jar. da selbens von Ulreichs house des Schuster. sechzich wienner phenning dreistunt in dem jar des Summen wirt sechzehen phunt geltes uber al. der get zwelf schilling dinstes her wider abe unserm lieben pruder Otten dem Chranneste. und die er von uns gechouft hat. umb ayns min sechtzich march silbers wienner gewichtes. der wir gar und gentzlichen verricht und gewert sein. ze ainer ewigen messe dem Capplan under dem Neuen carner ze wienne und seinen nahchomen da mit er die sechtzehen phunt geltes wider lait hat. die auff dem weingarten e gelegen sint der da haizzet der Sibenstokch. und leit under dem Chalnberge. also daz der selbe weingarte der egenanten gulte furbaz ledich und vrei ist. und die man dem vorgenanten Capplan und seinen nahchomen ledichlichen alle jar diennen schol ze rechten Taegen. in allem dem rechte als man uns die selben gulte e gedient hat und als sie mich vergenanten Elsepethen von vater und von muter anerstorben ist. und auch mit furzich und mit loz ze (rechtem erbtaile) an gevallen ist und unversprechenlichen in purchrechtes gewer her pracht haben. in allem dem rechte als der gescheft prief sagete den unser pruder Herl der Chrannest dem got gnade dat uber geben und geschaft hat. ze ainem ewigen selgerete versigilten mit unserr prudere und guten vreunde insigeln hern Andres des Chrannestes, zu den zeiten pharrer ze Ruprechteshofen, hern Georgen an dem Chienmarchte, und Jacobs des Chrannestes des Mundoffen aydem, die des selben gescheftes volfurer sint an Herlins unsers pruder stat. und durch pezzer sicherhait so setzen wir uns ich vorgenanter Dietreich der Chrannest und ich Elsepeth sein housvrowe unverschaidenlichen. mit sampt unsern erben an unsers vorgenanten pruders stat Otten des Chrannestes und seiner erben der egenanten Cappellen und dem Capplan. da selbens der die messe beget. uber die vorgenanten gulte ze rechtem gewern und scherm fur alle ansprache als purchrechtes recht ist und des Landes recht in Osterrich. und der Stat recht ze wienne und swaz im furbaz mit rechte dar an abe get. daz schol er haben auf uns und auf allem unserm gut daz wir haben in dem Lande ze Osterrich wir sein Lebentig oder Tod, und daz diser chauf und dise rede also stete sei, dar uber so geben wir im disen prief ze ainem offen urchonde und gezeuge und ze ainer ewigen vestenunge diser sache versigilten mit unserm insigel und auch mit der erbern leute insigeln unser guten vreunde hern Georgen an dem Chienmarchte und hern Perchtoldes des Chramer des Wenigen Leuppoldes pruder. die diser sache gezeuge sint mit iren insigeln und ander frume leute genuch. Diser prief ist geben ze Wienne nach Christes geburt dreutzehenhundert jar dar nach in dem ayn und dreizzigistem jar des suntages ze Mitter vasten.

Source Fulltext: Peter Peusquens