Wir Johanns von gotes genaden Bischof ze Pazzaw bechennen vnd tun kunt offenleich mit dem brief, Wannd der erwirdig vnd vnser lieb in got der Abbtt vnd der Conuent des chlosters cze Sitansteten, vns vnd vnserm gotshaws ze Pazzaw des widerchawffes der guter in der Obernprochnikch, gelegen in der pfarr ze ybsitz, die si vor von vnserm gotzhaws, doch auf einen widerchawf gechawfft heten, stat getan, vnd wider in vnser gewalt geantwurtt habent, Dar umbe sagen wir si vnd ir chloster des widerchawffes der egenanten guter gantzleich ledig vnd los an alles geuar, vnd ob hinfur icht gegenbrief, die si vnserm gotzhaws von desselben widerchawffes wegen vor geben hieten, funden oder furbracht wurden, von wem das war, dieselben gegenbrief sullen ab vnd tod, vnd in vnd irm obgenanten chloster an allen schaden sein vngeuarleich. Mit vrchunde des briefs, besigelten mit vnserm angehangem insigel. Geben ze Pazzaw an sand Merteins abent, Nach kristi geburde drewczehen hundert iar vnd in dem sechs vnd achtzigistem iare.

Source Fulltext: RAAB, Seitenstetten (=FRA II/33, Wien 1870) S. 337