Nota ad perpetuam rei memoriam. Anno domini M°. CCC°. LXXX°. ante dominicam Inuocauit quidam nobilis Hainricus Paeleitter dictus predia rusticana in Newndorf sita Purchrecht wlgariter nuncupata Abbacie Sytanstetensi seruicialia, quorum collacio ad rusticalem ipsius Officialem pertinere dinoscitur, asserens esse sua venerabili patri dno. Engelschalko Abbati ac Dyetlino Alphart, Hainrico Pertulano, Chunrado fabro et cuidam schalich eorundem prediorum possessoribus minis et terroribus quasi tyranicam mouit litem petens et postulans importune, quod sine omni cause cognicione deberent eici ab huiusmodi possessione. Nolens eciam, quod hec causa coram Iudice seu officiali Monasterij secundum colonorum domesticalium sentenciam decideretur, ipsam secundum nobilium vasallorum iudicium pecijt terminari. Quamobrem idem dominus Abbas Engelschalch eiusdem nobilis tyranidem cupiens mitigare nobilibus Monasterii vasallis ad audiendam et decidendam huiusmodi causam in Chrenstetn tertium terminum assignauit. Tandem prefata dominica Inuocauit strennui milites dns Otakcherus dictus Wolfstain, dns Waltherus de Sawsenekk, Georgius Chersperger et Laurentius Plesser arbitri et arbitratores ab vtraque parte per legitimam formam compromissi libere ac vnanimiter electi auditis allegacionibus et iuribus utriusque partis cognoscentes, quod olim Fridricus Paeleitter dicti pater Hainrici ante decennium pretacta predia in manu predicti officialis Sytanstetensis voluntarie resignauit et assignuit genero suo Johanni Rechstekch, qui paulo post eisdem Friderico paeleitter et Hainrico filio suo consencientibus ea vendidit et assignauit per dicti manum officialis Goschlino de Aw‚ a quo eciam fuerunt vendita et ad plures alios empcionis tytulo deuoluta. Pensantes nichilominus quod prescripta predia tali iure sunt ab olim hic habita, quod venditor eorum defendit ea et gwarentat emptori per vnum tantummodo annum atque diem, cum iam plures quam decem anni, in quibus sepedictus Henr. Paeleitter pro pretactis predijs nullam iudicialem fecit mencionem, fuerint transacti, laudauerunt arbitri sic et finaliter diffiniuerunt, quod idem Hainricus Paeleitter omnem litem et accionem, quam super prenarratis rusticanis predijs et pro alijs causis contra venerabilem patrem dominum Engelschalchum Abbatem et suos homines purchrechter predictos habuit et agitauit, fide data in manus eiusdem dni Abbatis totaliter resignauit, Ita quod pro hijs amplius ipsos nunquam debet impetere vel aliquatenus impugnare, Hoc adiecto, quod idem dns. Abbas venerandus debet eidem Hainrico Paeleitter esse graciosus et ipse vicissim fidelis et seruilis amicus locis et temporibus oportunis. Lata est huiusmodi laudi et arbitrij sentencia in Sytansteten in Stuba dni Abbatis Presentibus religiosis et discretis viris dno Vlrico priore, fratre Chunrado magistro Oblayij, fratre Johanne plebano eclesie sci. Michelis et Ruperto Celerario Mon. Sytansteten et famosis viris Dyetrico Zauchinger, Ottone Wasner, Friderico Chrayer, Geor.||
Meylesdorffer, Goschlino de Aw, laicis patauien. dyoc. testibus ad premissa specialiter conuocatis. Nouum consilium super premissis. Quidam sapientissimus miles dominus Otakcherus Wolfstain dictus in legibus patrie quam plurimum expertus super premissis consultus taliter respondebat, Quod pro consimilis cause decisione nobiles vasalli non sunt conuocandi, quia Officialis Monasterij, collator huiusmodi rusticalium prediorum purchrecht wlgariter nuncupatorum, secundum domesticalium colonorum sentenciam lites super hijs exortas de iure bene valeat cognoscere et iudicialiter terminare. Et ubi aliquis nobilis in hoc nollet iudicio contentari, auxilium aduocati pro defensione ac iurium conseruacione debeat inuocari.

Source Fulltext: RAAB, Seitenstetten (=FRA II/33, Wien 1870) S. 285-287