Wir Nicla von gots gnaden Abt des Gotshauzz cze Gersten vnd der gantz Conuentt daselbs vergehen vnd tuen chund mit dem offenn prief allen den di in sehent od hoerent lesen vmb den czehent auf vnserm hof datz dem dorff gelegen in sand Michels pfarr vnd auf den guetern die her nach geschriben sind auf der hofstat vnd datz dem Chaltsmid vnd an dem Galprunn in sand Michels pfarr vnd auf dem Geirspuhel in Sitansteter pfarr gelegen daz vnser hold od holdinn wie di genant sind oder werdent di wir gewinnen auf dem obgeschribenn hof den obgenanten czehent nemen schol von dem gotzhaus cze Sitansteten, also beschaidenleich wie offt oder mit wem wir den hof stiften es sey fraw oder man der selb mensch schol den czehent enpfahen von dem egenanten gotshaws cze Sitansteten vnd schol sechzigk pfennig raihen dem herren daselbs wer di czeit Abt ist, vnd ist derselb mensch furbas nichts mer da hin gepunten cze geben di weil er den hof inn hat. Waer aber daz daz vnser hold oder holdinn den czehent nicht nemen wolt oder daz gelt nicht raihen, das schol man vns cze wizzen tuen, so schull wir in dar zue noetten, daz er is alles folpring. Waer awer daz daz wir denn dar inn saumig waern vnd vnsern holden nicht noetten wolten, so mag wer richter ist cze Sitansteten vnsern egenanten holden oder holdinn dar czue noetten vnd hat gewalt in cze pfenten vmb di fargeschriben sechzigk pfennig vnd nicht vmb mer mit vnserm guetleichem willen. Daz in daz stet vnd vnuerchert beleib, dar vber czu einem sichtigen vrchund der handlung geb wir inn den offenn prief versigelt mit vnser obgenanten abt Nyclas vnd dez Conuent cze Gersten czwain anhangunden insigln. Der prief ist geben nach Christi gepurd vber drewtzehen hundert iar vnd dar nach in dem dreu vnd sibentzkisten iar an der heiligen junkfrawn sand Christein tag.

Source Fulltext: RAAB, Seitenstetten (=FRA II/33, Wien 1870) S. 260-261