Wir Engelschalch von Gots gnaden Abbt ze Sytanstetn vergehen offenbar mit dem gegenwurtigen Brief vnd tunchunt allen lewten die in ansehent oder hornt lesen, daz wir mit wolbedachtem mut nach gutem rat ze der czeit da wir ez wol getun mochten, den ganczen czehent grozzen vnd clainn czwair czehent haeuser der ainz haizzet auf der Oed daz ander an dem aygen payde in sand Michels pfarr gelegen mit alle dem daz dar zu gehort di von vns vnd von vnserrn Gotshaus ze Sytanstetn lehen sind die wir lediglich von Jansen Mayster Hansen sun gechauffet habn vm gelt daz wir an vnsers Gotshaus schaden mit vnser selber bysicht gewunnen haben, recht vnd redlich haben verschaufft vnd gegebn unserm getrewn diener Hainreichem dem Chasstner vnd vrown Helen seiner hausvrown vnd allen ir payder eriben vmb sechsthalb pfunt wienner pfenning, dar vmb wir sew gechaufft hetn, der wir ze rehtn taegen an all schaeden gancz vnd gar gericht vnd gewert sein. Wir habn in auch di vorgenantn czehent mit vnsrer hant verlihen vnd geantwurtt auz vnser nuczz vnd gwer in di irn in der beschaidnuss, daz sew allen irn frum damit schullen schykchen mit verseczzen vnd mit verchauffen wie vnd wem sew wellent vnd mit nuczzen vnd mit gebn an des Gothaus schaden mit vnserm vnd aller vnserr nachchomen gutlichem willn an alle irrung, Also daz igleicher der di obgenantn czehent von vns oder von unsern nachchomen wirt besten ez sey man oder vrow, der sol czwaynczig wienner pfenning gebn ze anlait vnd nicht mer. Wir sulln auch der vorgeschriben czehent von unsers genantn Gothhaus wegen ir recht lehenherrn vnd ir scherm vnd gwern sein fur all ansprach an aller stat, wo in des mit recht not vnd durfft geschieht, nach dem lantsrecht in Oesterreich. daz in daz allez hinfur also stet vnd vnuerchert beleib, dar vber zu ainem sichtigen vrchund vnd zu ainer warn geczeugnuss der handlung gebn wir in den offenn brief zu pezzer sycherhait versigiltn mit vnserm anhangundem Insygil. Der brief ist gegebn, da von vnsers Christi gepurd vergangn sind dreyczehen hundert Jar dar nach in dem czwai vnd sybenczgisten Jar an des heyligen Pabst Sand Urban Tag.

Source Fulltext: RAAB, Seitenstetten (=FRA II/33, Wien 1870) S. 259-260