Wir Albr. vnd Ott von gotes gnaden, hertzogen cze Osterreich, cze Steyr vnd cze Kernd. Tun chunt offenlich mit disem prief. Drz die erbern vnd geistlichen leut .... der abtt vnd der Conuent von Seitzesteten an ainem tayl, vnd vnser getreur Ott von czelking fur sich vnd sein erben an dem andern tayl, vmb den chrieg vnd missehelung, so tzwischen in geschehen ist, fur vns chomen vnd paten vns, daz wir denselben chrieg czwischen in verrichten vnd auztrugen, wan si des willichlich hinder vns gegangen weren, daz haben wir getan, in der weis, als her nach geschriben ist. Des ersten wellen wir, daz der vorgenant Czelkinger vnd sein erben auf dem Hof cze Tulwing, der des vorgenanten Chlosters ist, alle iar ein mal nemen sol, mit czwelif phertten, vnd nicht mer. Ez sol ouch der vorgenant Czelkinger vnd sein erben chainen holden, der auf dem egenanten Hof cze Tulwing gesetzen ist, oder der dartzu gehoret vmb dhainen totslag nicht pezzern an dem gut, denn alain an dem leib, vnuertzigen seiner wandel, der man im schuldig ist czegeben, nach des Landes recht cze Osterreich, wan er da bei vnd ouch bei allen andern rechten, als si von alter von seinen vordern an in chomen sind, beliben sol. Des geben wir czu vrchund disen brief. besigelten mit vnsern Insigeln. Der geben ist cze Wienn. an Samztag nach sand Gallen tag. Do man czalt von Christes geburd Tausent Drevhundert jar, darnach in dem acht vnd Dreizgisten Jar.

Source Fulltext: RAAB, Seitenstetten (=FRA II/33, Wien 1870) S. 207-208