Ich Vlreich von Tieming. vnd ich Diemut sein housurouwe. vnd all vnser erben. veriehen offenleich mit disem prief, vnd tun chunt allen den. die in sehent, oder horent lesen. Daz wir||
mit woluerdachtem mut vnd gutleichem willen aller vnser erben, die wir haben oder chumftichleich gewinnen, nah guter erchantnusse, zder zeit, do wirz wol getun mohten, durch vnserr vnd vnser nahchomen sel willen, der geistleicher herren Samnvng cze Seidensteten, ledichleich gegeben haben auf ir Oblaie ein gut, daz gehaizzen ist am Chalten aigen, daz vnser rechtez aigen ist gewesen, do von man alle iar dient ze rehter dienst zeit drey schilling phenning wienner mvnze vnd vier Oster chaes, der isleicher wert schol sein dreyr phehning. vnd Sehzich air. czwaie Herbst huner. vnd ein gans. czwaie vaschanch huner. einen Madaer vnd einen snitaer, mit allen rehten vnd nutzen, zeholtz vnd zeuelt. besueht vnd vnbesueht, als wir daz selb gut inne haben gehabt, Also beschaidenleich, daz sy vnserr gedenchnusse schullen haben mit einem iar tag alle iar, des naehsten Tages nach sand Vitals tag des obentes mit einer langen Vigili. mit schom geloutt. Wir schullen ouch vnd all vnser erben oder nahchomen, die vnser erb besitzent, des vorgeschrieben gutes der vorgenanten Samnvng ze Seidensteten gwer sein, als rehtes aigens reht ist in dem lant cze Oesterreich. Naemen aber sy dar vber des gutes dhainen schaden, von ansprach oder von andern sachen, swie sich daz fuget, den sy bestaetten mohten mit iren trewn, des schullen sy bechomen datz vns vnd datz aller der hab, die wir haben in dem Lant ze Oesterreich, mit vnserm gutleichem willen, an all chlag vnd furbot, in swelhem lantgeriht sy gelegen ist. Dar vber zu einem ewigen vrchunde, vnd czu einem waren getzeug diser sache geben wir in disen offen prief. versigelten mit meinem. Vlreiches von Tyeming, vnd mit Pilgreims von pratsdrvm meins pruder, anhangunden Insigeln, Daz ist geschehen vnd der prief gegeben cze Seidensteten, an vnser vrouwen tag in der vasten, do man von Christs gepurde czalt. Drevzehen hundert iar, dar nach in dem Siben vnd dreizgisten iar.

Source Fulltext: RAAB, Seitenstetten (=FRA II/33, Wien 1870) S. 205