Ich Fridreich Pauzz vnd mein housvrowe Geutt. vnd mein svn Leotolt vnd Fridreich vnd Hainreich. vnd mein tochter sophey vnd peters vergehen an disem prief offenwar. vnd tun chunt allen den. di in sehent oder horent lesen. daz wir daz lehen. daz da haist pei dem pertlinger vf der Oed. gentzleichen mit alle dev. daz dar zv gehort. vnser vrowen. vnd ir Gotshaus ze Sytansteten ze chauffen haben gegeben. mit gutem willen. vnd mit vnserer vreunt rat. vmb Ocht pfhunt pfhenning ze rechtem aigen, sunderleich vf daz siechhaus, den siehen ze hilf vnd ze trost. Wer auer ieman, der daz gotshaus datz sitansteten an sprech vmb daz vor genant lehen. dez sol ich Fridrich Pauzz vnd min housvrowe Geutt vnd meinev chint. di vor geschriben sint. des vor genanten gotshaus gewer vnd ouch verantwurten sein. Daz di Wandlung vnd der chauf stet vnd vnzeprochen peleib. gib ich dem vor genanten gotshaus disen prif. ze einem vrchunt. versiglt mit meinem insigel, vnd der erwern leut insigel. Hern Hainreichs von Horawe. vnd hern Hainreichs des sehenchn von Tobra. Dez sint zeug. Her Hainreich von Harawe. Hainreich der schench. Ruger von zauch. Dietrich von gleuzz, Vlrich der pauzz. Ditrich von Erbing. Alram stiller. Otacher sein pruder. Diecz ist geschehen do von Christes purt sint gewesen Tausent iar. vnd drevhundert iar. darnach in dem zwelften iar. an sant Georgen tag.

Source Fulltext: RAAB, Seitenstetten (=FRA II/33, Wien 1870) S. 152