Wir Ott. marchart. wolfhart, prueder vnd vnser vreunt wolfhart. Eckhart. Cunrat. Ditrich tun chunt allen den, die disen prief lesent oder horent lesen, daz ein chrieg waz zwischen vnserm herren apt Otten von Sytansteten vnd seinem gotshaus vnd vns, vmb daz gut datz elling. Do wart der chrieg also verslicht mit vnserm guten willen, nach vnser vreunt rat, vnd nach pidern leut slichtung. daz wir sein gestanden von dem selben chrieg, vnd haben in auf gegeben. vnd haben vns verzigen des selben gutes. auf vnsers herren genad apt Ot. von||
sytansteten. vmb sechs phunt phening wienner muencz, die er vns hat gegeben, daz wir sein gestanden von dem chrieg. vnd seint wier selben nicht insidels (sic) haben, so geb wir vnsern prief dem selben vor genanten apt Otten, mit der herren insigel, hern Hainreiches von harawe, Chunrates des lantrichter, Alrames des richter von Amsteten, Hainreiches von dem wasen, di pei der schidung sint gewesen. Ditz ist geschehen, do von Christes purt waren tausent iar. drev hundert iar- in dem zwelften iar. an sant Georgen tag.

Source Fulltext: RAAB, Seitenstetten (=FRA II/33, Wien 1870) S. 152-153