Wir Seifrit vnd Heinreich die Schenchen von Tobra, vergehen offenwar, vnd tvn chunt allen den, di disen brief sehent oder horent lesen, daz wir durch vnserr sel. vnd durch aller||
vnserr vodern sel willen haben avf gegewen, vnser vrowen datz Seytensteten, vnd dem erbern herren apt Otten dev guet vnd dev lechen, dev hie geschriebent sint, daz guet datz der linden an dem Rasperg, daz lehen pei der chirchen auf sant Mychelsperg, daz lechen avf dem puchel, da arnolt auf gesessen ist, vnd daz lehen in der trefnich hinter dem holtz, da per auf sas. dor ev verceich wir vnz allez dez gutes, daz apt Chvnrat gelevst vnd choft hat, zv dem vor genantem goteshavse, datz vnserm bruder hern Dietreich dem Schenchen, willichleichen vnd gvtleichen, vnd sagen iz ledich vor alle ansproch, von allen vnsern erben, vnd von aller vnserr nochchunft, dor vber geb wir dem erwern herren apt Otten vnd seinem goteshavs datz Seytensteten disen brief ze einem ewigen vrchunde. vnd ze einem ewigen gezevge, bestetiget vnd geuestet mit vnserr paider insigel, des sint gezevg. Her Ott vom||
stain, her heinreich von haraw, Rueger von Zauch. Dietreich von Glevzz, Dietreich von erwing, Alram der stiller, Dietreich am lechen, ekkel von winden, vnd ander bider levt vil. der namm nicht geschriben ist. Daz ist geschen vnd ergangen, da von Christes geburt ergangen sint tavsent iar, vnd drev hvndert iar, darnach in dem aindleften iar, an sunt veitz tag.

Source Fulltext: RAAB, Seitenstetten (=FRA II/33, Wien 1870) S. 146