Ich Ott von hausekk genant Stainer. tvn chvnt allen den. di den brief an sechent vnd horent lesen, daz ich mit meiner svn gutem willen den hof. der do heizzet hinterperch. vnd allez||
daz. daz zv dem hof gehoret. besuchtz vnd vnbesuchtz, genantz vnd vngenantz. vnd (swaz?) man schaft an dem zehent des selben hofes. mit dem walde. der dopei gelegen ist. vnd mit einem revt in dem selben wald. daz ich alssant het ze rechtem lehen von meinem herren abt Otten von Seitensteten, vnd von seinem Goteshavs. im han avf gegewen vnd seinem goteshavs vm Svbentzg phunt phenning. wer awer iemen. der daz vorgenant Goteshaus ansprech vmb daz vorgenant gvet. des sol ich vnd meinev chint desselben Goteshavs gewer sein. vnd swas sein daz goteshavs schaden nem. den sol ich im ab tvn vnd mein svn, vnd daz daz gelube stet beleib, dar vber gib ich im meinem herren abt Otten vnd seinem goteshavs, meinen brief mit mit meinem insigel. vnd sint des gezevg. her vlreich de Chelner. her heinreich der pfarrer datz ybsitz. vnd her hertweich sein bruder. her heinreich vonn winden, her hertweich. her Otto, her wolfger wasner. Ditreich von Glevzz. Alram der Stiller. Otacher sein bruder. Levpold der Ger. Ludweich der amman. vnd ander frvmer levt genug. Daz ist geschechen, da von Christes geburd waren tausent iar, vnd drev hvndert iar, dar nach in dem aindleften iar, an sant Erhartz tag.

Source Fulltext: RAAB, Seitenstetten (=FRA II/33, Wien 1870) S. 145-146